Украина президенти офиси раҳбари маслаҳатчиси Михаил Подоляк Италиянинг Corriere della Sera нашрига берган интервьюсида Россия билан ҳеч қандай музокаралар йўқлиги ва Москва музокаралар ўтказиш бўйича Киевга таклиф юбормаганини таъкидлади, деб ёзади «РБК».
«Европада, жумладан, Италияда ҳам Путин музокаралар олиб бориш ниятида деган фикр ҳукмрон, аммо бу бўлмаган гап», — деди Подоляк.
Унинг таъкидлашича, Владимир Зеленский Россия билан музокараларни бошлашнинг дастлабки шартларини айтиб ўтган — бу Россия армияси томонидан босиб олинган ҳудудларни озод қилиш, халқаро ҳуқуқни тан олиш, товон тўлаш ва ҳарбий трибунал яратиш.
Киев қайси президент билан музокарага тайёрлиги ҳақида саволга жавоб берар экан, Подоляк шундай деди: «Аввало энг муҳим шартлар, уларни қабул қиладиган шахс эмас. Менимча, Путин уларни қабул қилмайди». Унинг сўзларига кўра, Киев мулоқотни Украинанинг дастлабки шартлари бўйича олиб боришга рози бўлган сиёсатчи билан музокараларга тайёр. Бироқ, расмийнинг таъкидлашича, музокаралар бўйича якуний қарор Зеленскийда қолади.
Сентябрь ойи охирида, Россияга янги ҳудудлар қабул қилингандан сўнг, Зеленский Путин раҳбарлиги даврида Украина Россия билан ҳеч қандай музокаралар олиб бормаслигини маълум қилган эди.
Россия ҳукумати Украина билан музокараларга тайёрлигини бир неча бор эълон қилган. 7 ноябрь куни президент матбуот котиби Дмитрий Песков Киевнинг позицияси туфайли мулоқотга имкониятни ҳали кўрмаётганини билдирди.
Украинадан фарқли равишда Россия музокаралар учун ҳеч қандай шартга эга эмас. 8 ноябрь куни Россия Ташқи ишлар вазири ўринбосари Андрей Руденко Кремлнинг ҳеч қандай олд шартлари йўқлигини, фақатгина Украина хайрихоҳлиги кўрсатиши зарурлигини таъкидлади.
9 ноябрь куни Россия Ташқи ишлар вазирлиги матбуот котиби Мария Захарова яна бир бор Россия «жорий вазиятни ҳисобга олган ҳолда» музокаралар учун очиқлигини маълум қилди.
Украина президенти офиси вакили Михаил Подоляк эса музокараларни «Кремлнинг ультиматумларини тан олиш» деб атаб, қарши томонни «сўз ўйинини тўхтатишга» чақирди.
Изоҳ (0)