АҚШ президенти Жо Байденнинг таъкидлашича, Россия қўмондонлигининг Херсондан қўшинларни олиб чиқиш ҳақидаги қарори кутилган эди, аммо бу АҚШдаги Конгресс сайловлари якунланган пайтга тўғри келгани қизиқ бўлди. Бу ҳақда Байден Оқ уйда бўлиб ўтган брифингда гапирди.
«Аввало, бизга аллақачон маълум бўлган ушбу қарорни қабул қилиш учун улар АҚШ сайловларини охиригача кутгани мен учун қизиқ бўлди. Бу эса уларда, яъни Россия армиясида реал муаммолар борлигини кўрсатади», — деди Байден.
АҚШ президентининг сўзларига кўра, рус қўшинларининг Херсондан олиб чиқилиши «ҳаммага қиш мавсумида ўз позицияларини қайта кўриб чиқиш учун вақт беради».
«Украина Россия билан муросага тайёр-тайёр эмаслиги ҳақида қарор қабул қиладими ёки йўқ, буни ҳали кўриш керак», — деди Байден.
Журналистлардан бири Байдендан «Украина томонининг муросаси деганда, ҳудудий ён бериш назарда тутиляптими» деб сўради. АҚШ президенти эса бу Киевга боғлиқ, дея жавоб қайтарди: «Украинасиз Украина бўйича ҳеч нарса назарда тутилмайди».
Менимча, ҳозир масала Россия қўшинлари Эл-Фаллужадан (Байден дастлаб Херсонни Ироқдаги шаҳар номи билан адаштириб юборди — «Дарё» изоҳи) чекиняптими ёки йўқлиги. Мен Херсонни, Херсон шаҳрини назарда тутяпман. Улар дарёнинг шарқий томонига қайтмоқда. Ва энди нима бўлади: ҳар икки томон ҳам жароҳатларни даволаб, қишда нима қилишни, муросага келиш-келмасликни ҳал қилади, — деди Байден.9 ноябрь куни Россия мудофаа вазири Сергей Шойгу Херсон вилоятининг Днепр дарёси ўнг қирғоғида жойлашган қисмидан аскар ва техникаларни олиб чиқиш ҳақида кўрсатма берди. Бундай таклифни Украинадаги Россия қўшинлари қўмондони Сергей Суровикин ўртага ташлаган.
Meduza манбаларига кўра, Кремль Херсоннинг қайтариб берилишини «ҳарбий зарурат» ва «музокараларга таклиф» деб билмоқда. Манбаларга кўра, Россия ҳукумати армиянинг 2023 йилда янги тўлақонли ҳужумга тайёргарлик кўриши учун ўт очишни вақтинчалик тўхтатмоқчи. Аввалроқ Украина расмийлари Россия президенти Владимир Путин музокараларга тайёр эмаслигини айтганди.
Изоҳ (0)