Россия президенти Владимир Путин Балидаги G20 саммитига бормайди, аммо учрашувлардан бирида онлайн-форматда нутқ сўзлайди. Бу ҳақда Индонезия денгиз ва инвестиция масалалари бўйича мувофиқлаштирувчи вазир матбуот котиби Жоди Махарди Reuters’га маълум қилди.
Унинг сўзларига кўра, Россия раҳбарига ташқи ишлар вазири Сергей Лавров вакиллик қилади. Бу ҳақда аввалроқ Bloomberg манбалари ҳам айтганди.
Россиянинг саммитдаги иштироки қандай форматда бўлиши ҳақида расман эълон қилинганича йўқ. Кремль 9 ноябрь куни Путиннинг иштироки бўйича турли форматлар муҳокама қилинаётганини маълум қилди. Президент матбуот котиби Дмитрий Песков қарор ҳақида шу ҳафта эълон қилинади, деб ваъда берди. Аввалроқ Индонезия президенти Жоко Видодо ҳам Россия раҳбари учрашувда онлайн форматда қатнашиши мумкинлигини тахмин қилганди.
Саммитда Украина президенти Владимир Зеленский ҳам қатнашмоқчи. Унинг матбуот котиби Сергей Никифоров аниқлик киритишича, давлат раҳбари, катта эҳтимол билан, тадбирда онлайн-форматда иштирок этади.
G20 саммити (энг ривожланган ва ривожланаётган иқтисодиётга эга мамлакатлар, жумладан, Европа Иттифоқи давлатлари, АҚШ, Россия, Хитой, Буюк Британия, Бразилия, Саудия Арабистони ва бошқаларни бирлаштиради) 15—16 ноябрь кунлари Балида бўлиб ўтади. Индонезия апрель ойида G20 етакчиларига таклиф юборган. Украина ассоциацияга аъзо бўлмаса-да, тадбирга президент Владимир Зеленский ҳам таклиф этилган.
Мавзуга доир:
- Путин «совуқ нигоҳлар»дан қочиш учун G20 саммитига бормайди — Bloomberg
- G20 саммитига Путин келадиган бўлса, Зеленский унда иштирок этмаслигини маълум қилди
- Индонезия Путин ва Байден ўртасида учрашув ташкиллаштиришга тайёрлигини билдирди
- «Путин ва Зеленский G20 саммитига таклифни рад этмади» — Индонезия ташқи ишлар вазири
Изоҳ (0)