10 ноябрь куни Япония ва АҚШ ҳар икки йилда бир марта ўтказиладиган кенг кўламли Keen Sword қўшма машғулотларини бошлади. Япониянинг жануби-ғарбий қисмида ўтказилаётган машғулотларга 26 мингга яқин япониялик ва 10 минг америкалик ҳарбий жалб қилинади.
«Машғулотларда Австралия, Канада ва Буюк Британиядан ҳам жами тўртта ҳарбий кема ва иккита самолёт қатнашади… Япония ва АҚШдан мос равишда 20 ва 10 та кема, 250 ва 120 тага яқин самолётлар иштирок этади», — дея хабар бермоқда Kyodo агентлиги Япония Мудофаа вазирлигига таяниб.
Машқларнинг мақсади иттифоқчилар қуролли кучларининг «тийиб туриш ва ҳужумга жавоб қайтариш қобилиятини» кучайтиришдан иборат. Ҳарбий тадбирлар ўтказиладиган жойнинг танланиши Хитойнинг Шарқий Хитой денгизидаги бир қатор оролларга даъвогарлиги билан боғлиқ бўлиши мумкин. Машғулотлар 19 ноябрга қадар давом этади.
8 ноябрь куни Тинч океанидаги Япония қирғоқларида Австралия, Ҳиндистон, АҚШ ва Япония иштирокида Малабар ҳарбий-денгиз машқлари ҳам бошланди. Уларнинг мақсади Хитойнинг «экспансионистик ва агрессив сиёсатидан» ҳимояланиш деб эълон қилинди.
Изоҳ (0)