АҚШ президенти Жо Байден маъмурияти Киев ва Конгресс аъзоларининг илтимосларига қарамасдан, Украинага илғор учар қурилмаларни юборишдан бош тортди, деб ёзади The Wall Street Journal америкалик мансабдорларга таяниб.
Пентагон Grey Eagle МQ-1C дронларининг тақдим этилиши низонинг кучайишига сабаб бўлишидан хавфсираб, Киевнинг сўровини рад этган. Шунингдек, бу Москва учун АҚШ Россия ҳудудидаги позицияларни нишонга олиши мумкин бўлган қурол-яроғни юбораётгани ҳақидаги сигнал бўлиши ҳам мумкин эди. Бундан ташқари, Вашингтон агар дронлар уриб туширилса, улардаги технологиялар ўғирланишидан ташвишланган, бироқ бу хавотирлар қарор қабул қилишда ҳал қилувчи бўлмаган, дейилади хабарда.
Grey Eagle дронларини ишлаб чиқарувчи General Atomics вакили компанияга қарор ҳақида маълум қилинганини тасдиқлади, аммо тафсилотларни ошкор қилишдан бош тортди.
17 нафар конгрессмен сентябрдаёқ маъмуриятни Киевга Grey Eagle дронларини тақдим этиш масаласини кўриб чиқишни тезлаштиришга чақирганди.
Россия Мудофаа вазирлиги Днепрнинг чап қирғоғида мудофаа позициясини эгаллаш учун Херсондан қўшинларни олиб кетганини эълон қилганидан кейин, бу дронларни етказиб беришдан воз кечилгани ҳақида маълум бўлди.
Grey Eagle ундан ҳам машҳурроқ бўлган Predator дронининг бир версиясидир. Унинг парвоз давомийлиги — 30 соатгача. Дрон разведка учун ҳам, зарбалар бериш учун ҳам ишлатилиши мумкин — унга саккизта Hell fire ракеталарини ўрнатиш мумкин.
Ёзда WSJ АҚШнинг Россия Grey Eagle илғор технологияларини қўлга киритишидан хавфсираётгани ҳақида ёзганди. Америка томони уни етказиб беришни пайсалга солишининг яна бир сабаби — Украина ҳарбийларини Grey Eagle’ни бошқаришга ўргатиш зарурати бўлди. Reuters маълумотларига кўра, гап Киевга тўртта Grey Eagle дронларининг тақдим этилиши ҳақида бормоқда. АҚШ бунгача Украинага Switchblade ва Phoenix Ghost камикадзе дронларини етказиб берган.
Изоҳ (0)