7 ноябрь куни Москванинг Лефортово туман суди давлатга хиёнат ҳақидаги иш бўйича Г.К. Вердиян исмли шахсни ҳибсга олди. Катта эҳтимол билан, бу астраханлик 21 ёшли талаба Глеб Вердияндир, деб ёзади BBC.
28 октябрь куни Москванинг Солнсево туман суди Вердиян фамилияли шахсга нисбатан майда безорилик ҳақидаги маъмурий ишни кўриб чиқди ва уни 10 суткага ҳибсга олди. Бу муддат 7 ноябрда тугади, ва ўша куниёқ Вердиян Лефортово суди томонидан давлатга хиёнат ҳақидаги жиноят иши бўйича ҳибсга олинди.
Лефортово ва Солнсево судлари матбуот хизматлари иккала иш иштирокчиси ҳам Глеб Каренович Вердиян эканини тасдиқлади. BBC ижтимоий тармоқларда худди шу исм-шарифга эга 2001 йилда туғилган одамни топди. Солнсево суди ҳам айнан шу санани келтириб ўтган эди. Шу тариқа, Вердиян давлатга хиёнат ҳақидаги ишларнинг жамоатчиликка маълум бўлган энг ёш иштирокчисига айланди, деб ёзади BBC.
Нашр очиқ манбалардан топган маълумотларга кўра, Глеб Вердиян Астраханда туғилган бўлиб, Астрахан давлат меъморчилик-қурилиш университетида ўқийди.
Вердияннинг курсдошлари унинг ҳибсга олинганидан бехабар эканликларини айтган, дарсларда уни октябрь охирларида кўришган. Глебнинг онаси ўғлининг ҳибсга олингани юзасидан изоҳ беришдан бош тортган.
Қайд этилишича, Вердиян апрель ойида «ВКонтакте»да қурол ҳақидаги гуруҳда махсус операция ҳақидаги видеолардан бирига қуйидагича изоҳ қолдирган: «Травмат (тўппонча) эгаларига савол — уни сотиб олиш ва лицензия расмийлаштириш шунга арзийдиган ишми?». Унга ҳеч ким жавоб бермаган.
Изоҳ (0)