Зеленский Россия билан музокараларни бошлаш учун ўз шартларини маълум қилди

Украина президенти Владимир Зеленский Ғарб нашрларининг Киев Россия билан музокаралар ўтказишга даъват этилаётгани ҳақидаги хабарларидан кейин мулоқот бошлаш учун Украинанинг шартларини маълум қилди. Бу ҳақда у 7 ноябрь куни кечки мурожаатида айтиб ўтди.

Ушбу шартлар қуйидагилардан иборат:

• Россияга қўшиб олинган ҳудудлар қайтарилган ҳолда Украина ҳудудий яхлитлигининг қайта тикланиши;
• БМТга ҳурмат;
• барча зарарларнинг қопланиши;
• ҳар битта ҳарбий жиноятчининг жазоланиши;
• бу бошқа ҳеч қачон такрорланмаслигининг кафолатланиши.

Аввалроқ АҚШ ва НАТО ҳукумати Украина армияси Россия қўшинлари томонидан эгалланган Херсонни озод этганидан кейин Россия билан музокараларни бошлаши мумкин, деган фикрда эканлиги, АҚШ бундай хабарни Евроиттифоққа узатгани ва энди бу фикрни Украина ҳукуматига уқтираётгани хабар берилганди.

Ноябрь бошроғида Американинг The Washington Post газетаси АҚШ президенти маъмурияти Украина ҳукуматига мурожаат қилиб, Украинани қўллаб-қувватлаётган мамлакатлар аҳолисини хавотирга солмаслик учун Киев Москва билан музокараларга тайёрлигини оммага намойиш қилишни сўрагани ҳақида хабар берганди.

Украина Россия билан музокаралардан расман воз кечганди

30 сентябрь куни Кремлда Донецк ва Луганск халқ республикалари ҳамда Украинанинг Херсон ва Запорожье вилоятлари босиб олинган қисмларининг «Россия таркибига кириши» ҳақида шартномалар имзоланди. Ўша куниёқ Украина ҳукумати НАТОга қўшилиш учун ариза берди. Зеленский ўшанда Россия билан мулоқотга тайёрлигини айтган, лекин «бошқа президент билан» деган эди.

4 октябрь куни эса Украина расман Путин билан ҳар қандай музокаралардан бош тортди.

Россия вакиллари Украина билан 2022 йил баҳорида (Бучада тинч аҳоли ўлдирилганидан кейин) узилиб қолган музокараларни давом эттиришга тайёрлигини кўп марта айтган. Meduza манбаларига кўра, Россия ҳукумати Украина билан тўла-тўкис ярашув сулҳи ҳақида эмас, балки 2023 йил февраль мартида янги ҳужумга тайёрланиш учун муваққат осойишталикдан фойдаланиш мақсадида вақтинчалик ўт очишни тўхтатиш ҳақида келишиб олиш истагида бўлган.