Қўй гўшти нархи энг кўп пасайган: октябрь ойида жаҳон озиқ-овқат нархлари қандай ўзгарди?

FAO (Бирлашган Миллатлар Ташкилотининг Озиқ-овқат ва қишлоқ хўжалиги ташкилоти) ҳисоботига кўра, жорий йилнинг март ойидан бери арзонлашаётган озиқ-овқат маҳсулотларининг жаҳон бозорида нархлари октябрь ойида сентябрга нисбатан бироз — 0,4 пунктга пасайган.

FAO озиқ-овқат нархлари индекси октябрь ойида 135,9 ни ташкил этди (сентябрда 136,3 бўлганди). Жорий йилнинг март ойидаги энг юқори кўрсаткичга нисбатан индекс 14,9 фоизга пасайди, бироқ у ўтган йилнинг мос даврига нисбатан 2 фоизга юқорилигича қолмоқда.

Октябрь ойида ғалла нархининг жаҳон индекси сентябрь ойига нисбатан 1 фоизга, ўтган йилнинг октябрь ойига нисбатан 11,1 фоизга юқори бўлди. 

Ўтган ойга нисбатан ғалланинг барча асосий турларига жаҳон нархларида ўсиш кузатилди. Хусусан, буғдой 3,2 фоизга ўсди, «асосан Қора денгиз ғалла ташаббуси атрофида давом этаётган ноаниқлик туфайли», дейилади ҳисоботда. Озуқа донининг нархи 4,3 фоизга ошди.

Ўсимлик мойлари нархлари индекси октябрь ойида ўтган ойга нисбатан 1,6 фоизга, йиллик кўрсаткичларда эса деярли 20 фоизга паст бўлди. 

Ушбу индекснинг давом этиши палма, соя ва колза ёғларининг жаҳон нархларининг пасайиши билан боғлиқ бўлиб, бу кунгабоқар ёғи котировкалари ўсишини қоплагандан кўра кўпроқ, — дея тушунтиради FAO экспертлари.

Октябрь ойида сут маҳсулотлари нархлари индекси сентябрга нисбатан 1,7 фоизга паст бўлди. Унинг пасайиши кетма-кет тўртинчи ой давом этмоқда. Аммо йиллик ҳисобда нархлар 15,4 фоиз юқори бўлган. 

Октябрь ойидаги пасайиш Хитойдан кутилганидан камроқ харидлар ва спот шартномаларга талабнинг сустлиги билан изоҳланади, чунки импорт қилувчи мамлакатларнинг аксарияти жорий эҳтиёжларини тўлиқ қондирди, — дейилади ҳисоботда.

Бир ойда гўшт нархлари индекси 1,4 фоизга камайди. Бу динамика кетма-кет тўртинчи ой кузатилмоқда ва бу гўштнинг барча турлари бўйича жаҳон нархларига хосдир. Бироқ, ўтган йилнинг октябрь ойига нисбатан индекс 6,4 фоизга юқори. 

Октябрь ойида жаҳон бозорида қўй гўшти нархи энг кўп пасайганига валюта курслари динамикаси ва Тинч океани бўйидаги мамлакатлардан импорт ҳажмининг чекланганлиги шароитида таклифнинг мавсумий ўсиши сабаб бўлди. 

Ҳисоботда айтилишича, жаҳон миқёсида чўчқа гўшти нархи етакчи ишлаб чиқарувчи мамлакатларда ички талабнинг сустлиги билан биргаликда глобал импорт харидларининг қисқариши натижасида сезиларли даражада пасайди.

Октябрь ойида шакар нархлари индекси сентябрь ойига нисбатан 0,6 фоизга паст, лекин ўтган йилнинг мос ойига нисбатан 8,5 фоизга юқори бўлди.

Жаҳон шакар нархининг пасайиши жорий мавсум учун глобал таъминотнинг қулай прогнози ва Ҳиндистонда ишлаб чиқаришнинг кутилаётган ўсиши билан қўллаб-қувватланди.

Ўзбекистонда вазият қандай? 

Ўзбекистонда октябрь ойида 1,2 фоизлик инфляция қайд этилди. Бу ҳақда Давлат статистика қўмитаси ҳисоботида қайд этилган.

Шу тариқа, октябрда нархлар апрель ойидан бери энг кўп ўсди. Апрелда 1,5 фоизлик инфляция қайд этилган эди.

Йил бошидан бери инфляция 9,4 фоизга етган бўлса, йиллик ҳисобда ҳамон 12,2 фоизни ташкил этмоқда.

Октябрда нархлар ошиши бўйича етакчилик хизматларга тегишли бўлиб, ой давомида уларнинг нархлари ўртача 1,5 фоизга ошди.

Озиқ-овқат маҳсулотлари ушбу даврда 1,4 фоизга, ноозиқ-овқат маҳсулотлар нархлари эса ой давомида 0,9 фоизга ошди.

Ўзбекистонда бир ой ичида энг кўп сут маҳсулотлари ва тухум нархлари ўсган — 4,2 фоиз.

Нархлар ошиши бўйича кейинги ўринлар сабзавотлар, илдизмевалилар ва дуккаклилар (1,5 фоиз), гўшт маҳсулотларига (1,2 фоиз) тегишли бўлди.