Швециянинг янги бош вазири Улф Кристерссон НАТОга кириш учун Туркиянинг розилигини таъминлаш мақсадида Швеция ҳукумати курд ташкилотларидан узоқлашиши кераклигини айтди.
Ҳукумат раҳбари Курдистон ишчилар партиясига алоқадор ЙПГ курд жангари ташкилоти ва унинг сиёсий қаноти ПЙД билан ҳамкорликни тўхтатиш зарурлигини таъкидлади.
Швециянинг янги ташқи ишлар вазири Тобиас Биллстром ҳам Худди шундай баёнот билан чиқди. Унинг фикрича, бу қадам Туркия билан муносабатларни яхшилайди.
«Мамлакатининг асосий мақсади — НАТОга аъзо бўлиш», — деди у.
Сурия курдларининг ЙПГ жангарилари ва унинг сиёсий бўлими ПЙД Туркияда 1980 йилда Туркияга қарши қўзғолон бошлаган Курдистон Ишчилар партиясининг давомчиси деб билинади ҳамда Туркия, АҚШ ва Европа Иттифоқи томонидан террорчи сифатида кўрилади.
Туркия агар Швеция курдларни қўллаб-қувватлашни тўхтатмаса, унинг НАТОга киришига тўсқинлик қилишга ваъда берган.
Туркия Финляндия ва Швецияни террорчи гуруҳларни яширганликда айблади, президент Ражаб Тоййиб Эрдўғон эса улардан НАТОга аъзолик ташаббусларини қўллаб-қувватлаш эвазига гумондорларни Анқарага экстрадиция қилишни талаб қилди.
28 июнь куни Финляндия, Швеция ва Туркия ташқи ишлар вазирлари Анқаранинг икки Скандинавия давлатининг НАТОга аъзо бўлишини қўллаб-қувватлаши тўғрисидаги уч томонлама меморандумни имзолади.
28 июнь куни Мадриддаги НАТО саммитида альянс Швеция ва Финляндияни унга аъзо бўлишга таклиф қилди. Низомга кўра, таклиф НАТОга аъзо 30 та давлатда, жумладан Туркияда ҳам парламент томонидан ратификация қилиниши керак.
1 ноябрь куни Финляндия бош вазири Санна Марин Венгрия ва Туркияни мамлакати ва қўшни Швециянинг НАТОга аъзо бўлиш ҳақидаги аризаларини маъқуллашга чақирди.
Изоҳ (0)