АҚШ президенти Жо Байден маъмурияти Украина раҳбариятини Россия билан музокарага очиқлик кўрсатишга чақирмоқда, деб хабар берди The Washington Post (WP) манбалари. Газетанинг ёзишича, Вашингтон Киевнинг Россияни Владимир Путин бошқараётган пайтда Москва билан музокара олиб бормаслик тамойилидан воз кечишини истайди.
Нашр суҳбатдошларининг фикрича, бу Украинани музокараларга ундаш истагини англатмайди, аксинча, «Киев ҳукуматининг бошқа давлатлар томонидан қўллаб-қувватланишини таъминлашга уриниш»дир.
АҚШ расмийлари Украина президенти Владимир Зеленскийнинг музокаралардан бош тортгани Европа, Африка ва Лотин Америкасидаги айрим мамлакатларда можаронинг иқтисодиётга таъсиридан хавотир уйғотганини тан олди.
«Украина чарчоғи баъзи ҳамкорларимиз учун ҳақиқий муаммодир», — деди газета суҳбатдошларидан бири.
Газетанинг АҚШдаги манбаларига кўра, Украина президенти Владимир Зеленский музокараларни қўллаб-қувватлаши ва тахминан баҳорга келиб, ён бериши мумкин. Шу билан бирга, Киев «дипломатия ойнаси» очилиши кутилаётган қиш бошланишидан олдин «иложи борича кўпроқ ҳарбий муваффақиятлар ўрнатишга» уринмоқда.
WP таъкидлаганидек, Вашингтон зарур бўлганда ёрдамни давом эттиришга тайёрлигини очиқ эълон қилмоқда. Бироқ оралиқ сайловлардан сўнг Конгресс назоратини ўз қўлига олиши мумкин бўлган Республикачилар партиясидаги сўровномалар шуни кўрсатадики, партиянинг Киевга худди шу даражадаги ёрдамни давом эттиришни хоҳлайдиган аъзолари кам.
Россия—Украина музокаралари май ойида тўхтатилган эди. Делегацияларнинг сўнгги юзма-юз учрашуви 29 март куни Истанбулда бўлиб ўтган. Россия Донецк ва Луганск халқ республикалари, Запорожье ва Херсон вилоятларини аннексия қилганидан сўнг, Украина президенти Владимир Зеленский Владимир Путин Россия президенти лавозимидан кетмагунча, музокаралар ўтказиш имкониятидан бош тортди. Октябрь ойи охирида Путин Киев билан эҳтимолий мулоқот ҳақида фикр билдирар экан, «Москва мулоқот давом эттирилишини кутмоқда» деди.
Изоҳ (0)