НАТО бош котиби Йенс Столтенберг Россия Украинада ядро қуролидан фойдаланади, деб ўйламайди. Бу ҳақда у Туркиянинг НТВ телеканалига берган интервьюсида айтди.
«Россиянинг Украинада ядро қуролидан фойдаланиш хавфи кам, аммо оқибатлари ниҳоятда катта бўлади, шунинг учун биз бунга жуда жиддий қараймиз», — деди бош котиб.
Столтенбергнинг айтишича, Россия ўзини масъулиятсиз ва бепарво тутмоқда. Шунингдек, у ядро қуролидан фойдаланиш можаронинг моҳиятини ўзгартиришини таъкидлади. «Ядро урушида ғолиблар бўлмайди», — дея қўшимча қилди бош котиб.
Ядровий бомба атрофидаги можаро
Украинада уруш бошланганидан бери Россия президенти Владимир Путин ядро қуролидан фойдаланиш эҳтимолига ишора қилмоқда. Сентябрь ойида у бу баёнотлар «пўписа эмас»лигини таъкидлади. Бироқ октябрь ойи охирида у Россиянинг Украинага ядровий зарба беришидан «ҳеч қандай маъно йўқ»лигини айтди.
New York Times газетасининг ёзишича, октябрь ойида Россия ҳарбий раҳбарияти Украинада тактик ядро қуролидан фойдаланиш бўйича учрашувлар ўтказган.
Октябрь ойида Россия мудофаа вазири Сергей Шойгу ва Россия Қуролли кучлари Бош штаби раҳбари Валерий Герасимов АҚШ, Буюк Британия, Хитой ва бошқа давлатларга Украина гўёки «ифлос бомба» ёрдамида провокация тайёрлаётгани ҳақида хабар қилди. Кейинчалик МАГАТЭ Россиянинг бундай бомба ишлаб чиқилаётган бўлиши мумкин, деб кўрсатган Украина объектларини текширди — агентлик россиялик ҳарбийларнинг даъволарини тасдиқлайдиган ҳеч қандай далил топмади.
Изоҳ (0)