Республика шошилинч тиббий ёрдам илмий маркази директори Дониёр Алимов ис газидан заҳарланганда биринчи ёрдам қандай кўрсатилиши ҳақида маълумот берди.
Ис газидан жабрланган инсонга тезда биринчи ёрдам кўрсатиш керак. Сабаби бу пайтда бемор ҳаёти қил устида бўлиб, ҳар бир сония қадрли. Салгина эътиборсизлик салбий оқибатларга олиб келиши мумкин. Бунинг учун биринчи навбатда тез ёрдамга мурожаат қилиш, шифокор келгунига қадар жабрланувчини зудлик билан зарарланган ҳудуддан тоза ҳавога олиб чиқиш зарур, — дейди шифокор.
Шунингдек, қуйидагиларни амалга ошириш тавсия этилади:
- беморнинг қўл ва оёқларини кўтарган ҳолатда ётқизиш;
- нафас олишига халақит берувчи тугмаларни ечиб, ёқани очиш, камарни бўшатиш;
- жабрланувчининг ухлаб қолмаслигини назорат қилиш;
- тил орқага кетиб қолишининг олдини олиш учун уни ёнбош билан ётқизиш;
- нафасни стимуллаш, кўкрак қафасини артиш, оёқ ва қўлларни иситиш;
- новшадил спирти ҳидлатиш;
- ҳушига келган вақтида йиқилиб, жароҳатланмаслиги учун чоралар кўриш;
- беморнинг ҳолати яхши бўлса, иссиқ чой ичириш;
- оғир даражадаги заҳарланиш ҳолатларида жабрланувчига тиббиёт ходимлари келгунига қадар оғиздан оғизга нафас, юрак ёпиқ массажини бажариш.
Айни пайтда бу турдаги фавқулодда ҳолатларда жабрланган беморларга ўз вақтида тиббий ёрдам кўрсатиш мақсадида Республика шошилинч тиббий ёрдам илмий маркази, унинг ҳудудлардаги филиаллари ва туманлардаги бўлимларида шифокорлар тун-у кун фаолият олиб бормоқда.
Изоҳ (0)