Қашқадарёнинг Чироқчи тумани тиббиёт бирлашмасига қарашли Уйшун оилавий поликлиникасида хизмат вазифасини бажариб турган 59 ёшли шифокор калтакланди. Бу ҳақда Қашқадарё вилояти Соғлиқни сақлаш бошқармаси матбуот хизмати хабар берди.
Дастлабки маълумотларга кўра, поликлиникада 35 йилдан буён умумий амалиёт шифокори (айни пайтда оилавий шифокор) бўлиб ишлаб келаётган Х.Д. қабулига 3 ноябрда соат 18:30 атрофида бир нотаниш эркак икки нафар аёл билан келган. Эркак шифокорга турмуш ўртоғининг бетоблигини айтиб, уни текшириб қўйишини сўраган.
Шифокор унга беморни текширгунига қадар оёқ кийимидаги лойни ташқарида ювиб келишини айтган. Шундан сўнг эркак шифокорни ҳақоратлаб, бўйнидан бўғиб, аёвсиз муштлаб, тепкилаб ташлаган.
Олган жароҳатлари натижасида шифокор ҳушини йўқотган ва Чироқчи тумани тиббиёт бирлашмаси шошилинч тиббий ёрдам бўлимига пешона, иккала ёноқ, юз, бурун усти, бўйин соҳаси юмшоқ тўқималари лат ейиши, кўкарган жароҳатлари, тирналмалар, бош чайқалишига гумон ташхиси билан ётқизилган. Айни пайтда даво муолажалари давом эттирилмоқда.
Мазкур ҳолат вилоят соғлиқни сақлаш бошқармаси назоратига олинган, ҳуқуқни муҳофаза қилувчи идоралар томонидан ўрганилмоқда.
Бундан аввал Қашқадарё вилоятининг Ғузор туманида хизмат бурчини бажараётган 57 ёшли шифокор калтаклаганди. Уни калтаклаганлар қамоққа олинган.
Мавзуга доир: Сурхондарёда шифокорни калтаклаганларга нисбатан жиноят иши қўзғатилди
Изоҳ (0)