Олий Мажлис Сенати сайти 2 ноябрь куни хакерлар ҳужумига учраган эди. MY5 телеканалининг «Марказий студия» кўрсатувида эса бу ҳужум 14 ёшли болалар томонидан амалга оширилгани айтилган. Ички ишлар вазирлиги Киберхавфсизлик марказининг аниқлик киритишича, ушбу ҳолат аслида бошқа бир фуқаро томонидан содир этилган.
Хабарга кўра, мазкур ишни амалга оширган фуқаро Наманган вилояти Норин туманида 3 ноябрь куни ҳуқуқни муҳофаза қилиш органлари томонидан аниқланган.
Шунчаки заифлигини кўрсатиб қўймоқчи эдим. 28 октябрь куни сайт эгаларига бу ҳақда хабар юборилган, лекин жавоб келмаган. Шу сабабдан бу ишни амалга оширгим келди, — деди йигит.Унинг аниқлик киритишича, телевидение орқали ўзини Marsh Golden гуруҳи бошлиғи дея таништирган шахснинг бу ишга алоқаси йўқ.
Интервьюдаги ҳамма маълумотлар ёлғон. Marsh Golden гуруҳини мен яратганман. Telegram канал ҳам меники. Мен веб сайтга ҳужум уюштиришим ноқонуний эканини билмагандим, соҳа ходимлари уйимизга келиб, буни тушунтирди. Қилган ишимдан пушаймонман, — дейди у.
Йигитнинг отаси ҳам интервью бериб, ўғлига 2022 йилда компьютер олиб бергани, 3 ноябрь куни уйига соҳа ходимлари келиб, Сенат сайтига ҳужум қилган шахс унинг ўғли эканини исботлаб берганини билдирди. Ҳозирда далилий ашёлар бўйича экспертиза тайинланиб, ҳолатга ҳуқуқий баҳо бериш мақсадида орган ходимлари томонидан ўрганиш ишлари давом эттирилмоқда.
Изоҳ (0)