АҚШ президентининг миллий хавфсизлик бўйича маслаҳатчиси Жейк Салливан 4 ноябрь, жума куни эълон қилинмаган ташриф билан Киевга борган. Бу ҳақда Bloomberg мухбири Анна Хордерн воқеадан хабардор манбаларига таяниб маълум қилган.
«Жейк Салливан бугун Киевга эълон қилинмаган ташриф билан борди… Салливан АҚШнинг хавфсизлик соҳасидаги янги ёрдам пакети тафсилотлари билан бўлишди. Ташриф Эроннинг Россия истилосидаги иштироки чуқурлашиши фонида амалга оширилди», — деб ёзди журналист Twitter’да.
Кейинроқ Оқ уй Салливаннинг Украина пойтахтига ташрифи ҳақида расмий хабар эълон қилди. «Миллий хавфсизлик бўйича маслаҳатчи Жейк Салливан АҚШ Украина ва унинг халқини ўз суверенитети ва ҳудудий яхлитлигини ҳимоя қилишда қатъий қўллаб-қувватлашига урғу бериш учун бугун Киевда Украина президенти Владимир Зеленский, президент офиси раҳбари Андрей Ермак, мудофаа вазири Алексей Резников ва бошқалар билан учрашди», — дейилади хабарда.
Аввалроқ АҚШ Украинага 400 миллион долларлик қўшимча ҳарбий ёрдам эълон қилган, унинг доирасида Т-72 танклари ва Hawk зенит-ракета тизимларини модернизация қилишини айтганди.
Россия махсус операцияси бошланганидан кейин Киевга америкалик олий мартабали шахслар кўп марта ташриф буюрган. Улар орасида давлат котиби Энтони Блинкен ва мудофаа вазири Ллойд Остин ҳам бор. Шунингдек, Киевга турли вақтларда Еврокомиссия раҳбари Урсула фон дер Ляйен, Евроиттифоқ дипломатияси раҳбари Жозеп Боррел, Буюк Британия собиқ бош вазири Борис Жонсон, Польша, Латвия, Литва ва Эстония президентлари Анжей Дуда, Эгилс Левиц, Гитанас Науседа, Алар Карис ва бошқа Ғарб дипломатлари ҳам келган.
АҚШ президенти Жо Байден Украинада расмий ташриф билан бўлмаган, бироқ у ерга боришга тайёрлигини билдирган. Март ойида у Польшанинг Жешува шаҳрига (Украина билан чегарадан 85 км масофада жойлашган) ташриф буюрган, у ерда АҚШ армиясининг 82-ҳаво-десант дивизияси базаси бор.
Изоҳ (0)