Хитой раҳбари Си Цзиньпин Пекинда Германия канцлери Олаф Шольц билан учрашди. Германия етакчиси Хитойга бир кунлик ташриф билан келди, дея хабар бермоқда Sinxua.
Матбуот хабарларига кўра, Си Цзиньпин Хитой ва Германия «ўзгариш ва ағдар-тунтар даврида» дунё тинчлиги учун кўпроқ ҳамкорлик қилиши кераклигини айтган.
Қайд этилишича, икки давлат раҳбарларининг учрашуви Хитойда коронавирус бўйича қаттиқ чекловлар шароитида ўтган. Си Цзиньпин Германия канцлерини ҳимоя ниқобисиз кутиб олган, бироқ у билан қўл бериб кўришмаган.
Бундан ташқари, Шольц Хитойга етиб келганидан сўнг, унинг самолёти экипажни алмаштириш учун дарҳол Жанубий Кореяга учиб кетишга мажбур бўлган. «Акс ҳолда, эски экипаж Хитойда карантинда қолиши керак бўларди», — деди Германия Вазирлар Маҳкамасидаги манба.
Аввалроқ Мюнхен хавфсизлик конференцияси раҳбари Кристоф Хойсген Германия канцлери Олаф Шольцнинг Хитойнинг Россияга бўлган муносабатига таъсир кўрсатиш эҳтимолини баҳолаган эди. Хойсген Пекиннинг Москвага муносабати ўзгаришини иллюзия деб атаган ва бунга фақат G20 саммитида таъсир ўтказиш мумкинлигини таъкидлаган. «Аммо Хитойни Россия майдонидан олиб ташлаш умиди — фақат иллюзия», — деган у.
Изоҳ (0)