Херсон вилоятининг босиб олинган ҳудудида жойлашган Скадовск шаҳрида россияпараст полициячилар билан зиддиятга борган 56 ёшли маҳаллий фуқаро Татяна Мудренко омма олдида қатл этилган. Бу ҳақда Financial Times воқеа гувоҳларига ва марҳуманинг опаси Наталя Чёрнаяга таяниб хабар берган.
Маълум бўлишича, Мудренко ҳамшира бўлиб ишлаган ва Россия истилосига қарши фаол норозилик кўрсатган. Сўнгги зиддиятлардан бири октаб бошида юз берган, ўшанда у украиналик полициячиларга Россия ҳарбийлари билан ҳамкорлик қилаётгани учун танбеҳ берган ва «Скадовск — бу Украина!» — деб қичқирган.
Гувоҳлар сўзларига кўра, шундан кейин кўп ўтмай, аёл ва унинг турмуш ўртоғи Анатолий Орехов ҳибсга олинган. 15 октябрь куни Наталя Чёрнаяга синглиси вафот этгани ҳақида хабар беришган. Қўшнилари даъво қилишича, Мудренконинг «оғзига нимадир томизиб», сўнг суд биноси олдига осишган. Орехов озод этилган, унинг бир қўли синган, танасида эса дўппослаш излари бўлган. Мудренконинг дафн маросимидан кейин у яна ғойиб бўлган.
Мудренконинг опасига топширилган, унинг вафоти ҳақидаги гувоҳномада ўлимга «механик асфиксия», яъни нафас йўлларининг қисилиши натижасида нафас бўғилиши сабаб бўлгани айтилади.
Financial Times журналистлари қайд этишича, улар Татяна Мудренконинг ўлими қай ҳолатда юз берганини мустақил тасдиқлай олмайди, бироқ аввалроқ, октябрь ўрталарида унинг вафоти ҳақида Украинанинг «Инсон ҳуқуқлари учун матбуот ташаббуси» ҳуқуқни ҳимоя қилиш гуруҳи ва «Senzor.net» нашри хабар берган.
Изоҳ (0)