Афғонистонда кўкнори етиштириш 2021 йилга нисбатан 32 фоизга ошиб, 233 минг гектарни ташкил қилди. Бу ҳақда Бирлашган Миллатлар Ташкилотининг Наркотиклар ва жиноятчилик бўйича бошқармаси ҳисоботида айтилади.
Асосий экин майдонлари Афғонистоннинг жануби-ғарбий вилоятларига тўғри келади — улар кўкнори етиштириладиган умумий майдоннинг 73 фоизини ташкил қилади ва ҳосилдорликнинг энг катта ўсиши ҳам шу ерда кузатилган. БМТ ҳисоботига кўра, Ҳелманд вилоятида экин майдонларининг бешдан бир қисми кўкнорига ажратилган.
« ‘Толибон’ шу йилнинг апрель ойида кўкнори етиштиришни тақиқлаганини эълон қилганидан сўнг, опиум нархи кўтарилди. Фермерларнинг кўкнори сотишдан тушган даромади 2021 йилдаги 425 миллион доллардан 2022 йилда 1,4 миллиард долларга етди, бу янги кўрсаткич 2021 йилда қишлоқ хўжалиги секторидан олинган умумий даромаднинг 29 фоизига тенг. 2021 йилда опиат сотишдан олинган даромад қишлоқ хўжалигидан олинган умумий даромаднинг атиги 9 фоизини ташкил қилганди», — дейилади ҳисоботда.
Шу билан бирга, ҳужжатда кўкнори сотишдан тушган даромаднинг ошиши харид қобилиятига таъсир кўрсатмагани, чунки ўша даврда инфляция кескин ўсгани ва озиқ-овқат маҳсулотлари нархи ўртача 35 фоизга ошгани қайд этилган.
«БМТ Наркотиклар ва жиноятчилик бўйича бошқармаси Гиёҳванд моддалар мониторинги платформаси томонидан аниқланган мусодара ҳолатлари Афғонистондан опиат савдоси 2021 йил августидан буён узлуксиз давом этганини кўрсатади. Афғон опиатлари дунёдаги барча ноқонуний опиат бозорининг қарийб 80 фоизини таъминлайди», — дейилади бошқарма ҳисоботида.
Мутахассислар «Толибон» ҳокимиятни қўлга киритганидан сўнг Афғонистондан гиёҳванд моддалар савдоси сезиларли даражада ошади, деган хавотирни бир неча бор билдиришган, чунки қишлоқларда яшовчи афғонларнинг кўпчилиги учун кўкнори етиштириш ва опий сотиш узоқ вақтдан бери асосий даромад бўлиб келган. Фалокатли иқтисодий вазият ва озиқ-овқат муаммоси ортиб бораётган бир пайтда, афғонларнинг наркотик бизнесига қарамлиги янада кучаймоқда.
Изоҳ (0)