Россия ҳарбий раҳбарияти октябрь ойида Москва Украинада тактик ядро қуролини қандай ва қаерда қўллаши мумкинлигини муҳокама қилиш учун учрашувлар ўтказган. Бу ҳақда The New York Times газетаси АҚШ расмийлари орасидаги «кўплаб» манбаларга таяниб хабар бермоқда. Бундай учрашувлар тўғрисида оммавий ахборот воситалари биринчи марта хабар топди.
NYT маълумотларига кўра, Россия президенти Владимир Путин бу муҳокамаларда қатнашмаган. Бироқ, бундай учрашувлар бўлганининг ўзи Оқ уйда хавотир уйғотган, чунки бу Путиннинг ядро қуролидан фойдаланиш эҳтимоли ҳақидаги баёнотлари «фақат сўзда қолиб кетмаслиги мумкин»лигини кўрсатади.
Шу билан бирга, газетанинг таъкидлашича, Вашингтонда ҳозир Россия зарбага тўғридан-тўғри техник тайёргарлик кўра бошлагани ҳақида ҳеч қандай далил йўқ.
NYT Россия Мудофаа вазирлигидан изоҳ талаб қилмаган.
Уруш бошланганидан кейин Россия ҳукумати агар мамлакат ҳудудий яхлитлигига таҳдид туғилса, ядро қуролидан фойдаланиши мумкинлигини бир неча бор айтган.
Сентябрь ойида Путин ядровий зарба ҳақидаги гаплар «пўписа эмас»лигини таъкидлади. Октябрь ойи охирида у Россиянинг Украинага ядровий зарба беришга «на сиёсий, на ҳарбий истаги йўқ»лигини айтди.
1 ноябрь куни Россия Федерацияси Хавфсизлик кенгаши раиси ўринбосари Дмитрий Медведев агар Киев Россия томонидан аннексия қилинган Украина ҳудудларини куч билан қайтаришга ҳаракат қилса, бу ядровий зарба учун тўғридан-тўғри баҳона бўлишини айтди.
Изоҳ (0)