Буркина-Фасо шарқида жангарилар томонидан уюштирилган пистирмада камида 15 нафар аскар ҳалок бўлди, деб хабар бермоқда Deutsche Welle.
Бу ҳақда нашрга мамлакат хавфсизлик кучлари маълум қилган. Жангарилар ҳужумида яна 4 нафар аскар яраланган, 11 нафари бедарак йўқолган. Армия маълумотларига кўра, қидирув ишлари олиб борилмоқда, қўшимча кучлар юборилган.
«Ҳудудни қўриқлаш ва қидирув ишларини ўтказиш учун қўшимча кучлар юборилди. Буркина аскарлари ва давлат томонидан тан олинган ‘Ватан ҳимояси кўнгиллилари’ фуқаролик милицияси таъминот миссиясидан қайтаётганда жангарилар томонидан ҳужумга учради», — дея маълум қилди хавфсизлик кучлари.
Мамлакат 2015 йилдан бери исёнчиларга қарши курашиб келади. У ерда фаол қуролли гуруҳлар мавжуд бўлиб, уларнинг баъзилари «Ал-Қоида» ва ИШИД террорчилик тармоқларига алоқадор.
Ҳужумдан бир неча кун олдин «Ал-Қоида»га алоқадор гуруҳлардан бири уч ойдан бери жангарилар томонидан қамалда бўлган шимолий Жибо шаҳридаги ҳарбий базага ҳужум учун жавобгарликни ўз зиммасига олган эди.
Изоҳ (0)