Илон Маск 27 октябрь куни компанияни сотиб олганидан сўнг, Twitter директорлар кенгашини ишдан бўшатди. Бу ҳақда АҚШ Қимматли қоғозлар ва биржа комиссиясига таяниб «РБК» хабар бермоқда.
27 октябрда бирлашиш келишуви натижасида Маск Twitter’нинг ягона директори бўлди. Шартнома шартларига кўра, битим тугалланганда директор бўлган шахслар ўз фаолиятини тугатди, — дейилади ҳужжатлардан бирида.
Reuters’га кўра, ҳужжатлар эълон қилинганидан сўнг Маск компания директорлар кенгашини ўзи бошқаришини айтди. Тадбиркор янги директорлар кенгашига кимлар киришини маълум қилмади.
Маск 28 октябрь куни Twitter’ни 44 миллиард долларга сотиб олиш бўйича келишувга эришди. Шундан сўнг у Twitter’нинг бош қароргоҳига ташриф буюрган видеосини эълон қилди.
Компанияни сотиб олгач, Маск Twitter’да «кенг фикр-мулоҳазага эга бўлган» одамлар иштирок этадиган «цензура кенгаши»ни эълон қилди.
Бундан ташқари, New York Times ёзганидек, бизнесмен компания ходимларини ишдан бўшатишни бошлашни буюрди.
Аввалроқ Илон Маск Twitter’нинг ишдан бўшатилган уч нафар раҳбарига салкам 200 миллион доллар тўлаши кераклиги ҳақида хабар берилганди.
Изоҳ (0)