АҚШ Эронни Россияга дронлар етказаётгани учун жавоб бериши ҳақида огоҳлантирди

АҚШ ҳукумати Эрон томонидан чет элга қурол етказиб берилиши, шу жумладан, Россияга Украина шаҳарларини бомбардимон қилишда фойдаланиш учун дронлар тақдим этилишига қарши курашиш учун барча воситаларни ишга солмоқчи. Бу ҳақда Давлат департаменти вакили Нед Прайс брифингда маълум қилди.

«Бизда шундай воситалар борки, улар санкциялар ва бошқа иқтисодий чоралар чегарасидан чиқади. Биз якунда ўз манфаатларимизга жавоб берадиган нарсани қилмоқчимиз», — деди Прайс.

Унинг сўзларига кўра, Эроннинг ёвуз ниятли ҳаракатларига қаршилик кўрсатиш масаласида Вашингтон ҳеч нарсани эътиборсиз қолдирмайди ва хавф олдини олиш учун бор имкониятни ишга солади.

Прайс қўшимча қилишича, АҚШ бу қадамлар ҳақида олдиндан эълон қилмоқчи эмас.

«АҚШ Эроннинг учувчисиз учар қурилмалар дастури туғдираётган хавфга бор диққатини қаратган. Эрон учар қурилмалари аллақачон Сурия, Ироқ ва Яқин Шарқда қўлланилган ва энди Украинада ҳам ишлатилмоқда», — деди у.

Эрон дронлари

Россияга камикадзе дронларни Эрон етказиб бераётгани ҳақида АҚШ ва Европа мамлакатлари ҳукуматлари гапирганди. Бу ҳақда Америка ОАВлари ҳам ёзганди. Хусусан, The Washington Post манбаларига кўра, Теҳрон Москвага «ўнлаб» Mohajer-6 ва кўп сонли Shahed-136 учувчисиз учар қурилмаларини тақдим этмоқчи бўлган. 20 октябрь куни Евроиттифоқ Эроннинг дрон ишлаб чиқарувчи Shahed компаниясига қарши санкциялар киритди.

Россиянинг БМТдаги миссияси Ғарб мамлакатлари маълумотларини дезинформация кампанияси ҳамда Москва ва Теҳронга босим ўтказиш учун тўқиб чиқарилган баҳона деб атади. Эроннинг БМТдаги доимий вакили Амид Саид Ираваний ҳам дронлар етказиб берилаётгани ҳақидаги айбловлар асоссиз эканини айтганди.