Қодиров Украинада алоҳида «Қасос» махсус операцияси ўтказилгани ҳақида маълум қилди

Чеченистон раҳбари Рамзан Қодиров Украинада «Қасос» махсус ҳарбий операцияси олиб борилаётганини маълум қилди. Бу ҳақда у ўз Telegram-каналида ёзди.

«Махсус ҳарбий операция зонасидаги жанговар ҳаракатлар тафсилотлари кимга қизиқ бўлса, ‘Қасос’ номи остидаги алоҳида махсус операция муваффақиятлари ҳақида маълум қилмоқчиман», — деди у.

Чеченистон раҳбари сўзларига кўра, 25—27 октябрь кунлари Николаев-Кривой Рог йўналишида ушбу операция иштирокчилари «ўт очиб зарба берувчи воситалар» орқали 657 нафар жангчини йўқ қилиб, яна 300 кишини яралаган. Шунингдек, 40 та махсус ҳарбий техника йўқ қилинган.

Украинанинг Соледар шаҳри йўналишида «Ахмат» отряди жангчилари бир кунда тўртта танк, бешта жанговар пиёдалар машинаси, битта зирҳли машина ва тўртта пикапни йўқ қилган. «95 нафар иблис издошлари ва иккита мустаҳкамланган позициялар миномётлар ёрдамида йўқ қилинди. Бу фақат дастлабки ва жуда қисқача маълумотлар, холос», — деб ёзди Қодиров.

Унинг айтишича, энди Украина қуролли кучлари «қарши ҳужум кайфиятида эмас», Россия қўшинлари эса «душманнинг янги ҳудудларини қамраб олмоқда».

Аввалроқ Рамзан Қодиров Херсон вилоятидаги чечен бўлинмаларидан бирининг 23 жангчиси ҳалок бўлгани ҳақида хабар берганди. Яна 58 киши яраланган, деди Чеченистон раҳбари. Унинг сўзларига кўра, ўша жангда 70 нафар Украина аскарлари ҳам ҳалок бўлган.