27 октябрь куни МДҲ Парламентлараро ассамблеяси доирасида Россия Федерал Мажлиси Федерация Кенгаши ва Ўзбекистон Олий Мажлиси Сенати ўртасидаги ҳамкорлик бўйича Парламентлараро комиссиянинг 7-мажлиси ўтказилди, деб хабар бермоқда «Дарё» мухбири.
Маълум бўлишича, учрашувда аввало таълим соҳасига эътибор қаратилди.
Бу ерда сенаторлар умумий гапларни эмас, амалий масалаларни ҳал қилишга ҳаракат қилишяпти. Таълим соҳаси биз учун ниҳоятда муҳим масала. Мана ҳозир 46 минг ўзбекистонлик ёшлар Россиянинг олий ўқув юртларида таълим олмоқда, бу катта рақам. Биз биринчи навбатда таълим сифатига шу билан бирга у ерда ўқиётган талабаларнинг шароитлари, ҳақ-ҳуқуқлари ҳамда таълим учун яратилаётган шароитлар ҳақида гаплашдик. Биз ёшларнинг таълими билан боғлиқ барча масалаларни доимо мониторинг қилиб боришимиз керак, — дейди Содиқ Сафоев.
Шунингдек, Олий Мажлис Сенати раисининг биринчи ўринбосари меҳнат миграцияси мавзусига ҳам тўхталиб ўтди.
Меҳнат миграцияси деганда миллионлаб инсонларнинг тақдири ҳақида гапиряпмиз. Бугун бизни безовта қилаётган масалаларни ҳам илгари сурдик. Яъни уларнинг ҳақ-ҳуқуқлари, ҳимояланиши, шароитлари ва бу борада келажакда қилинадиган ишлар ҳақида келишиб олинди.Бундан ташқари, ҳаммамиз мамнуният билан қайд этаётган масала бу — Россиядан Ўзбекистонга келаётган туристик оқимнинг тобора ортиб бориши. Буни биз, албатта, олқишлаймиз, чунки бу Ўзбекистоннинг иқтисодий ўсиши учун келаётган туристлар катта омил бўлиши мумкин ва бугун бу борада ахборот алмашинувини тизимли равишда йўлга қўйиш зарурияти ҳам қайд этилди. Иккала мамлакатнинг туризм вазирликлари жалб қилинган ҳолда бу масала атрофлича муҳокама қилинди, — дейди Олий Мажлис Сенати раисининг биринчи ўринбосари Содиқ Сафоев.
Изоҳ (0)