Freedom Finance ўз номини «Цифра»га ўзгартирди

Freedom Holding инвестиция компаниясининг Россия бизнеси ўз номини «Цифра»га ўзгартирмоқда. Бу ҳақда «Коммерсантъ» хабар бермоқда.

Ребрендинг Freedom Finance инвестиция компанияси ва шу номдаги банкни сотилиши доирасида амалга оширилмоқда.

Молиявий ташкилотларнинг устав капиталидаги 100 фоиз компания асосчиларидан бири Максим Повалишин томонидан сотиб олинган. Битим тахминан 140 миллион долларни ташкил этди.

«Цифра — бу сўнгги йилларда саноат ривожланишининг асосий тенденцияси сифатида рақамлаштириш билан бевосита боғлиқ бўлган оддий ном, — дейилади компания матбуот баёнотида.

Freedom Finance — 2008 йилда тадбиркор Тимур Турлов томонидан ташкил этилган. Брокерлик, депозитарий ва дилерлик хизматларини тақдим этади, асосан АҚШ фонд бозоридаги фаолиятга эътибор қаратади.

2021 йил 1 апрелдан 2022 йил 31 мартгача бўлган ҳисобот даврида Freedom Holding даромади 565 миллион долларга етди (йил давомида 60 фоизга ўсишга эришди).

Freedom Finance инвестицион компанияси 2018 йилнинг апрель ойидан бошлаб Ўзбекистонда ўз фаолиятини бошлаган. Компания мамлакатда молия брокерлиги, инвестиция маслаҳатлари ва банк хизматлари каби соҳаларда иш юритади.