Нидерландия Украинага ҳарбий техника учун 500 миллион евро ажратади. Бу ҳақда Нидерландия Мудофаа вазирлиги сайтида эълон қилинди.
Нидерландия мудофаа вазири Кайс Оллонгреннинг сўзларига кўра, маблағ Европа тинчлик фондидан олинади.
Қайд этилишича, Европа Иттифоқи ўқув миссиясига Нидерландия—Германия миналардан тозалаш машқларини киритиш имконияти кўриб чиқилмоқда.
Оллонгрен Украина ҳарбийлари ҳам қурол-яроғларни ўрганишда, ҳам ҳарбий билим ва кўникмаларни эгаллашда сезиларли ютуқларга эришаётганини таъкидлади.
«Қурол ва ўқ-дорилар етказиб бериш, шунингдек, украиналик ҳарбийларни ўз қуролларидан оптимал фойдаланиши ва сақлаб туриши учун ўқитиш ҳам ўз самарасини бермоқда. Ҳарбий соҳадаги ушбу прогресслардан Украинанинг оқилона фойдаланаётганини кўрмоқдамиз», — деди вазир.
Бундан ташқари, у осмон мудофаасини кучайтириш учун Украинага жами 15 миллион евролик зенит-ракеталар топширилишини эълон қилди.
Изоҳ (0)