Британия собиқ бош вазири Борис Жонсон қироллик ҳукуматининг янги раҳбари сайловида қатнашишдан бош тортди, у Консерватив партия (тори) раҳбари лавозимига ўз номзодини қўймайди. Бу ҳақда Sky News хабар берди.
«Кўп нарса таклиф қила оламан, деб ўйлайман, лекин қўрқаманки, ҳозир шунчаки бунинг учун номувофиқ бўлган вақт», — деди Жонсон.
Ториларнинг қўллаб-қувватлаши «жозибадор» эди, қироллик бош вазири лавозимига қайтиш учун имкониятларим яхши эди, деди у. Шу билан бирга, «парламентда ягона партия» мавжуд бўлмаган шароитда самарали бошқарув имконсизлигини қўшиб қўйди у. Собиқ вазир таъкидлашича, у собиқ мудофаа вазири Риши Сунак ва савдо алоқалари бўйича кичик вазир Пенни Мордонт билан келишувга эриша олмаган. Шу муносабат билан, энг яхши қарор бош вазирликка даъвогарликдан воз кечиш ва ғолибни қўллаб-қувватлаш ҳисобланади, дея аниқлик киритди у.
Жонсонни 59 нафар консерватор депутатлар қўллаб-қувватлаган, сайловолди пойгасини давом эттириш учун у 100 нафар парламент аъзоси овозини қўлга киритиши керак эди. Сунакни энг кўп одам қўллаб-қувватламоқда — у 144 та овоз тўплади.
Жонсон Консерватив партиянинг жамоатчилик палатасидаги бош ташкилотчиси собиқ ўринбосари Крис Пинчер иштирокидаги можаролар фонида Британия бош вазири лавозимини тарк этганди. Собиқ бош вазир торилар етакчиси бўлиш учун пойгада иштирок этиш режаларини маълум қилмаганди. Бироқ 22 октябрь куни у Лиз Трасснинг истеъфосидан кейин Доминиканадаги таътилини тўхтатиб, Буюк Британияга қайтаётгани хабар берилди.
Консерваторлар 31 октябрь, душанба кунига қадар янги етакчини сайламоқчи. Сунак бош вазир лавозимига ўз номзодини 23 октябрь куни қўйди. У партияни бирлаштиришга ва Британиядаги молиявий вазиятни тузатишга ваъда берди.
Лиз Трасс нима учун бош вазирликдан кетди?
Бош вазир Лиз Трасс иқтисодий муаммоларни ечишга қодир эмасликда айбланганидан кейин, 20 октябрь куни истеъфога чиқиши ҳақида эълон қилди. У бош вазир лавозимини 45 кун давомида эгаллаб турди, бу замонавий Британия тарихида рекорд даражада қисқа муддатдир. Бу вақт мобайнида у канцлер Квази Квартенг билан биргаликда тақдим этилган Келси йил учун қисқа бюджет лойиҳаси учун танқидга учрашга улгурди, шундан кейин мамлакатда молия ва ипотека бозорлари кескин пасайиб кетди.Шунингдек, Трасс Квартенгнинг таклифи билан солиқларни камайтириш ва айни вақтда бой британияликлар учун солиқ мажбуриятларини сусайтиришни режалаштиргани учун ҳам танқид қилинди. Шундан кейин Буюк Британиянинг беш йиллик давлат облигациялари даромадлилиги 4,6 фоизга, максимал даражагача ўсди, бу эса мамлакат қарз қоғозларига талаб пасайганини билдиради. Фунт стерлинг курси ҳам тушиб кетди ва доллар курсига деярли тенг бўлиб қолди. Можародан кейин у Квартенгни ишдан бўшатди, бироқ бу уни босимлардан сақлаб қолмади, охир-оқибат у истеъфо берди.
Изоҳ (0)