Германиянинг Потсдам шаҳрида жойлашган Барберини музейида Letzte Generation («Сўнгги авлод») ҳаракати фаоллари импрессионист Клод Моненинг «Пичан ғарами» картинасига картошка пюресини сепиб юборди, деб хабар беради «РИА Новости». Акцияда икки киши қатнашди — картинага пюре тўкканидан кейин улар полга ўтириб, деворга қўлларини елим билан ёпиштириб қўйди.

«Одамлар оч қолмоқда, одамлар совуқда қолмоқда, одамлар ўлиб кетмоқда — биз иқлим фалокатига дуч келдик, сиз эса расмларга тўкилаётган картошка пюре ёки томатли шўрвадан хавотирдасиз, холос», — деди фаоллардан бири. Фаоллар қўлга олинди.

«Пичан ғарами» (1890 йил) картинаси аввалроқ аукционда 110 миллион долларга сотилган эди. Музей хабарига кўра, активистлар хатти-ҳаракатлари натижасида унга зарар етмаган.

Ўтган ҳафта Just Stop Oil ташкилоти фаоллари Лондондаги Миллий галереяда Ван Гогнинг «Кунгабоқарлар» картинасига томатли шўрва тўкиб юборганди. Картина шиша билан қоплангани учун зарар кўрмаганди.