Шимолий Корея Жанубий Корея отган ўқларга жавобан, баравар ўт очиш реактив тизимидан ўнта снаряд учирди. Бу ҳақда Корея Марказий телеграф агентлиги хабар берди.
КХДР ҳарбийлари маҳаллий вақт билан 24 октябрь куни 5:15 (Тошкент вақти билан 1:15) атрофида ўзининг ғарбий соҳилларидан ўт очган. Бу Жанубий Корея КХДР кемаси шимолий чегара чизиғини босиб ўтганига жавобан узган огоҳлантирувчи ўқларга жавобан амалга оширилган (Northern Limit Line — Сариқ денгизда Шимолий ва Жанубий Корея ўртасидаги демаркация чизиғи).
Yonhap агентлиги маълумотларига кўра, КХДР кемаси чегара чизиғини Пеннёндо ороли яқинида 3:42 да кесиб ўтган. Шундан кейин Жанубий Корея ҳарбийлари огоҳлантирувчи ўқлар узган, кема эса шимолга чекинган.
Қайд этиш жоиз, Шимолий Корея мунтазам равишда баллистик ракеталар учириб келади. Сўнгги марта бу 9 октябрь куни юз берганди. Синовлар Япон денгизи қирғоғида, Мунчхон шаҳри ҳудудида амалга оширилган, ракеталар 350 км масофани босиб ўтган.
Изоҳ (0)