Жаҳон соғлиқни сақлаш ташкилоти маълумотларига кўра, дунёда йилига 10 миллион киши туберкулёз хасталигига чалинади. Улардан 1,7 миллиони касаллик оқибатида ҳаётдан кўз юмади. Яқинда хитойлик олимлар мазкур бактериянинг иммунитетга осон «чап бериши» сабабини аниқлади.
Туберкулёз 99 фоиз ҳолатда ҳаво-томчи йўли орқали юқади ва асосан ўпкани зарарлайди. Хасталик қўзғатувчиси сил таёқчалари ҳисобланиб, улар ҳар қандай шароитга чидамли. Яъни иссиқда ҳам, совуқда ҳам кўпая олиш хусусиятини йўқотмайди. Тадқиқотчилар хулосасига кўра, сил таёқчаси инфекциядан зарарланган ҳужайранинг ўз-ўзини йўқ қилишига йўл бермайди ва яллиғланиш реакциясини келтириб чиқаради.
Шу боис Хитой микробиология институти олимлари сил таёқчасининг бутун геномини ва у ажратиб чиқарадиган ҳамда ҳужайраларга таъсир кўрсатиши мумкин бўлган барча оқсилларни ўрганди. Якунда шубҳа остига олинган 201 та оқсил орасидан ПтпБ деб номлангани ажратиб олинди. Маълум бўлишича, у зарарланган ҳужайраларнинг ўз-ўзини йўқ қилишига қаршилик кўрсатиш хусусиятига эга. Яъни бемор иммунитетининг жавоб реакциясини сусайтириб, инфекциянинг ўпка бўйлаб кенг тарқалишига имкон яратади.
Ушбу тадқиқот натижаси келгусида патогеннинг ўзига эмас, бевосита оқсилларга таъсир қилиш орқали туберкулёзни даволаш усулларини ишлаб чиқишга ёрдам бериши мумкин.
Мавзуга доир: Сил касалини аниқлашда 3 та янги тест тавсия қилинди
Изоҳ (0)