Андижон вилоятининг Шаҳрихон тумани ва Хонобод шаҳрида чет эл валюталарининг ноқонуний муомалага киритилишининг олди олинди. Бу ҳақда Иқтисодий жиноятларга қарши курашиш департаменти хабар қилди.
Қайд этилишича, Бош прокуратура ҳузуридаги департаментнинг Хонобод шаҳар бўлими томонидан тезкор тадбир ўтказилган. Унда Избоскан туман деҳқон бозори атрофида валюта айирбошлаш билан шуғулланиб келган Н.С. (муқаддам Жиноят кодексининг 177-моддаси (валюта қимматликларини қонунга хилоф равишда олиш ёки ўтказиш) билан судланган) ва С.Н. фуқаро Г.га жами 3 600 долларни 40,5 миллион сўмга сотган вақтида ушланган.
Шунингдек, департаментнинг Шаҳрихон туман бўлими томонидан ИИБ ходимлари билан ҳамкорликда тезкор тадбир ўтказилган. Унда деҳқон бозори ҳудудида валюта айирбошлаш билан шуғулланиб келган Т.М. фуқаро Қ.га 3 500 долларни 39,4 миллион сўмга сотган вақтида ашёвий далиллар билан қўлга тушган.
Мазкур ҳолатлар юзасидан Жиноят кодексининг 177-моддаси билан жиноят ишлари қўзғатилган. Ҳозирда тергов ҳаракатлари ўтказилмоқда.
Изоҳ (0)