Самарқандда 1600 доллар эвазига жарима майдончасидаги машинани чиқариб беришни айтган шахс ушланди. Бу ҳақда вилоят ички ишлар бошқармаси хабар бермоқда.
Қайд этилишича, 20 октябрь куни ИИВ ШХББ Самарқанд вилояти бўйича бошқармасига фуқаро ариза билан мурожаат қилган. Унда 16 октябрь куни спиртли ичимлик истеъмол қилиб, ўзига тегишли бўлган Nexia-3 автомашинасини бошқариб бораётганида ЙПХ инспекторлари уни алкотестердан ўтказгани, спиртли ичимлик истеъмол қилгани аниқланганини билдирган.
Шу сабабли унга нисбатан маъмурий баённома расмийлаштирилиб, автомашинаси жарима майдончасига қўйилганини маълум қилга. Шундан сўнг у автомашинани жарима майдончасидан чиқаришга ҳаракат қилиб юрганида «Б» исмли шахс ушбу ишни ҳал қилишда ёрдам бериши айтган. У билан гаплашганида Самарқанд вилояти ИИБ ЙҲХБда ишловчи танишлари орқали унга нисбатан чора кўрилмаслик, ишини ижобий ҳал қилиб бериши мумкинлигини, яъни унга нисбатан тузилган маъмурий баённомани судга юбормасдан ҳайдовчилик гувоҳномасини олиб бериб, транспорт воситасини жарима майдончасидан чиқариб беришини айтиб, 1600 доллар беришни талаб қилиб келаётганини, ушбу фуқарога нисбатан қонуний чора кўришни сўраган.
Мазкур ариза юзасидан 20 октябрь куни ИИВ ШХББ Самарқанд вилояти бўйича бошқармаси тезкор ходимлари томонидан ўтказилган тезкор тадбир давомида фуқаро Қ.Б. ариза муаллифидан 1600 доллар миқдоридаги пулларни олган вақтида ушланиб, ҳужжатлаштирилган.
Мазкур ҳолат юзасидан Самарқанд вилояти ИИБ ҳузуридаги тергов бошқармаси томонидан терговга қадар текширув ҳаракатлари олиб борилмоқда.
Изоҳ (0)