Қозоғистон президенти Қосим-Жўмарт Тўқаев унинг мамлакати «тасодифан эркинликка эришган» деб ўйламайди, қозоқ халқи «суверенитетга олиб борувчи муқаддас йўлдан узоқ йиллар юриб ўтган». Бу ҳақда у Республика куни арафасида давлат мукофотларини топшириш маросимида айтиб ўтди, деб ёзади Tengrinews.
Тўқаев «Суверенитетсиз халқ ҳам бўлмайди» деган қозоқ нақлини келтириб ўтди. «Сир эмас, баъзан гўёки Қозоғистон тасодифан озодликка эришгани, мамлакатимиз охирги бўлиб ўз мустақиллигини эълон қилгани ҳақида юзаки, асоссиз баёнотлар янграйди. Буни ўша вақтда юзага келган вазиятни тўғри баҳолашга қодир бўлмаган одамларгина айта олади», — деди давлат раҳбари.
1990 йил 25 октябрь куни Давлат дуверенитети ҳақидаги декларация — «мамлакатимиз мустақиллигига йўл очиб берган буюк ҳужжат» қабул қилинган, деб эслатди у.
«Айтиш мумкинки, Суверенитет тўғрисидаги декларация бутун халқнинг кўп йиллик умумий саъй-ҳаракатлари натижасига айланди. Албатта, бундай қадамни ташлаш осон бўлмаган. Ўша даврдаги сиёсий, ижтимоий ва демографик вазиятни ҳисобга олган, бу жуда дадил қадам бўлган», — дея қайд этди президент.
Тўқаев ҳужжатни «жасурлик ва дипломатия, ақл ва сабр ғалабаси» деб атади.
2020 йил декабрида Россия Давлат думаси депутати Вячеслав Никонов «Қозоғистон ҳудуди — Россия томонидан берилган катта совға» эканини айтганидан кейин, Россия ишлари бўйича вақтинчалик ишончли вакил Қозоғистон Ташқи ишлар вазирлигига чақириб, унга норозилик нотаси топширилганди.
Шундан кейин Қозоғистон президенти Қосим-Жўмарт Тўқаев мамлакат ҳудудини қозоқларга «ташқаридан ҳеч ким» бермагани қайд этилган мақола ёзди.
Изоҳ (0)