Наманганда «Яшил макон» умуммиллий лойиҳасининг кузги мавсумига старт берилди. Бу ҳақда «Дарё» мухбири Азизбек Абдувалиев хабар бермоқда.
Кузги мавсумда вилоятда 5 миллион 774 минг дона манзарали ва мевали дарахт кўчатлари экиш режалаштирилган. 2023 йил баҳорида эса уларнинг сони 9 миллион 623 мингга етказилади. Бу режаларни амалга ошириш учун вилоятда 7 миллион 740 минг дона кўчат заҳираси шакллантирилган.
Янги Наманган туманининг «Бунёдкор» маҳалласи ҳудудида бошланган дарахт экиш тадбирида вилоят ҳокими Шавкат Абдураззақов иштирок этди. У кузги кўчат экиш акцияси давлат раҳбари ташриф буюрган маҳалладан бошланганига урғу бериб, вилоятни янада кўкаламзорлаштириш бўйича режалар билан ўртоқлашди.
«Мавсумий гуллардан бора-бора воз кечиб, ўзимизнинг атиргулларга қайтмоқчимиз. Наманган халқаро аэропорти йўлида бундан тўрт йил аввал эккан атиргулларимиз ҳали ҳам барқ уриб очилиб турибди. Райҳон ва ялпизларни ҳам кўпайтирамиз. Кўриниши кайфиятингизни кўтаради, ҳиди оламни тутади, соғлиққа ҳам фойда. Наврўз байрамидан сўнг барча маҳаллаларга бепул тарқатмоқчимиз. Гулчиларимизга ҳозирдан 7 миллионга яқин райҳон кўчатларини етиштиришга буюртма бериб қўйдик», — деди Шавкат Абдураззақов.
Маълумот учун, Наманганда жорий йил баҳор мавсумида 9,5 миллиондан ортиқ кўчат экилган ва уларни суғориш ҳамда парваришлаш учун ҳудудларга масъуллар бириктирилганди.
Мавзуга доир: Ўзбекистонда «Яшил макон» лойиҳаси доирасида йил якунига қадар 75 млн дона кўчат экилади
Изоҳ (0)