Shavkat Abdurazzaqov: Namanganda mavsumiy gullardan bora-bora voz kechib, o‘zimizning atirgul, rayhon va yalpizlarga ko‘proq e’tibor qaratamiz (video)

Namanganda “Yashil makon” umummilliy loyihasining kuzgi mavsumiga start berildi. Bu haqda “Daryo” muxbiri Azizbek Abduvaliyev xabar bermoqda.

Kuzgi mavsumda viloyatda 5 million 774 ming dona manzarali va mevali daraxt ko‘chatlari ekish rejalashtirilgan. 2023-yil bahorida esa ularning soni 9 million 623 mingga yetkaziladi. Bu rejalarni amalga oshirish uchun viloyatda 7 million 740 ming dona ko‘chat zahirasi shakllantirilgan.

Yangi Namangan tumanining “Bunyodkor” mahallasi hududida boshlangan daraxt ekish tadbirida viloyat hokimi Shavkat Abdurazzaqov ishtirok etdi. U kuzgi ko‘chat ekish aksiyasi davlat rahbari tashrif buyurgan mahalladan boshlanganiga urg‘u berib, viloyatni yanada ko‘kalamzorlashtirish bo‘yicha rejalar bilan o‘rtoqlashdi.

“Mavsumiy gullardan bora-bora voz kechib, o‘zimizning atirgullarga qaytmoqchimiz. Namangan xalqaro aeroporti yo‘lida bundan to‘rt yil avval ekkan atirgullarimiz hali ham barq urib ochilib turibdi. Rayhon va yalpizlarni ham ko‘paytiramiz. Ko‘rinishi kayfiyatingizni ko‘taradi, hidi olamni tutadi, sog‘liqqa ham foyda. Navro‘z bayramidan so‘ng barcha mahallalarga bepul tarqatmoqchimiz. Gulchilarimizga hozirdan 7 millionga yaqin rayhon ko‘chatlarini yetishtirishga buyurtma berib qo‘ydik”, — dedi Shavkat Abdurazzaqov.

Ma’lumot uchun, Namanganda joriy yil bahor mavsumida 9,5 milliondan ortiq ko‘chat ekilgan va ularni sug‘orish hamda parvarishlash uchun hududlarga mas’ullar biriktirilgandi.

Mavzuga doir: O‘zbekistonda “Yashil makon” loyihasi doirasida yil yakuniga qadar 75 mln dona ko‘chat ekiladi