Россия Хавфсизлик кенгаши раиси ўринбосари Дмитрий Медведев америкалик тадбиркор Илон Маскнинг Донбассда вазият қандай кетаётгани ҳақидаги саволига жавобан уни «Ғалаба кунида» Москвага таклиф қилди.
Twitter’да Маск россиялик сиёсатчидан Баҳмутда ишлар қандай кетаётганини сўради.
Бунга жавобан Медведев «Ғалаба куни Москвада кўришгунча», деб ёзди.
Уларнинг Twitter’даги баҳси Россия Хавфсизлик кенгаши раҳбари ўринбосарининг Британия бош вазири Лиз Трасс билан хайрлашув тарзда ёзган кулгили твити ортидан бошланди. Трасс 20 октябрь куни истеъфога чиқишини эълон қилганди. Медведев «Хайр Трасс, салат баргларини эса табриклайман» деб твит қолдирган. Салат барги британияликларнинг ҳазилига ишора қилади: улар қайси узоқроқ қолади – бош вазирликда Лиз Трассми ёки янги ҳолатда салат барги, деб гаров ўйнамоқда. Маск Медведевнинг ушбу ҳазилини «жуда яхши троллинг» деб атади.
Баҳмут — Донецкдан 60 километр шимолда жойлашган шаҳар. 2021 йил бошида шаҳар аҳолиси 72 минг кишини ташкил этган. Баҳмут йўналишидаги фаол жанглар бир неча ойдан бери давом этмоқда.
Изоҳ (0)