Фарғона шаҳрида ҳаракатланиб кетаётган йўловчи ташувчи микроавтобусда ёнғин чиқди. Бу ҳақда «Дарё»га вилоят ИИБ ЖХХ йўл ҳаракати хавфсизлиги бошқармаси ахборот хизмати маълум қилди.
Қайд этилишича, 2022 йилнинг 18 октябрь куни соат 18:15 ларда Фарғона шаҳар «Ёрмозор» МФЙ Ал-Фарғоний кўчасида ҳаракатланиб кетаётган «Газель» русумли автотранспорт воситасида ёнғин чиққан. Олтиариқ туманида яшовчи фуқаро Э.Т. бошқарувидаги ушбу микроавтобус «Йўловчи ташувчи» МЧЖга тегишли бўлган.
Ёнғин натижасида транспорт воситасининг мотор ва ички салон қисми қисман ёнган. Ёнғин қисқа вақтда вилоят Фавқулодда вазиятлар бошқармаси ходимлари томонидан бартараф этилган.
Дастлабки маълумотларга кўра, ёнғин натижасида тан жароҳати олган ва жабрланганлар йўқ. Ҳозирда тегишли ташкилотлар томонидан ёнғиннинг келиб чиқиш сабаби ва етказилган зарар миқдори аниқланмоқда.
Изоҳ (0)