Тошкент вилояти ҳокими Зоир Мирзаевнинг Бўстонлиқ туманида бўлиб ўтган сайёр қабулида 88 ёшли отахон 8 сотих ери собиқ ҳоким томонидан олиб қўйилиб, сотиб юборилганини, бироқ ери учун шу пайтга қадар компенсация тўлаб берилмаганини маълум қилди. Бу ҳақда Зоир Мирзаевнинг жонли эфирда намойиш қилиб турилган навбатдаги қабулида сўз борди.

1935 йил Қибрай туманида туғилганман. Ҳозирда Чирчиқ шаҳрида яшайман. Вилоятнинг собиқ ҳокими Шукрулло Бобоев вақтида менга 8 сотих ер берганди. У ерга кўчат экиб, дарахт ўстириб, анча меҳр бергандим. 2018 йил Рашидов деган ҳоким ўша еримни олиб қўйиб сотиб юборган экан. Мен бу бўйича вилоятнинг собиқ ҳокими Даврон Ҳидоятовга мурожаат қилгандим. У фақат мени алдаб келади. Ерим учун шу пайтгача на компенсация олдим ва на ер, — дейди отахон.

88 ёшли отахон Мирзакарим бува Қўчқоров вилоят ҳокими Зоир Мирзаевга у яшаётган жойга бориши кераклигини, адолатсизлик бўлаётганини кўрсатмоқчи эканини айтади.

Чирчиқ шаҳри илмга йўқ, кутубхонани йўқ қилиб юборди. Уйимиз олдидаги чироқни ўчириб, йўқ қилган. Кўчамиз зимистон. Бобур ҳайкалининг олдида бирорта гул йўқ. Амир Темур ҳайкали қани? Алишер Навоий ҳайкали чанг бўлиб ётибди. Наҳотки шуни тозалаб қўядиган одам йўқ, — дейди отахон вилоят раҳбарига мурожаат қилар экан.

Отахон гаплари сўнгида Зоир Мирзаев билан расмга тушмоқчилигини айтиб, унинг мурожаатини ҳам газетада ёритишларини сўради.

Ҳокимлик ахборот хизматининг қўшимча қилишича, қабул 5 соат давом этган. Унда Зоир Мирзаев 117 нафар фуқаро билан мулоқот қилган.

Қонунчиликда белгиланган тартибда масала ва муаммолар муҳокама қилинди, — дейилади ҳокимлик ахборотида.