Олий тоифали кўз шифокори Ҳикматулло Содиқов «Дарё» мухбирига берган интервьюсида ҳозирда телевидение, радио ва интернет тармоқларида биологик фаол қўшимчаларни тарғиботи кучайиб бораётгани ҳақида ўз фикрларини айтиб ўтди.
«Юз хил дардга даво сифатида тақдим этишяпти. Кўз касалликлари бўйича оладиган бўлсак, кўз томчи дорисини кўрсатиб, катаракта касаллигидан халос этади, деб реклама қилишмоқда. Ҳаттоки улар оросида «Минус 5 кўзойнак тақар эдим, мана шу дорини ишлатиб, яхши бўлиб кетдим» деяётганлари ҳам бор. Буларнинг барчаси ёлғон, ишонмаслик керак», — деди шифокор.
Офталмологнинг алоҳида таъкидлашича, мурожаат қилаётган беморларнинг орасида биоқўшимчалардан фойдаланиш қанчалик тўғри эканлиги ҳақида сўрайдиганлар кўп.
«Ҳар куни бунга дуч келамиз. Беморлар 3-4 та биоқўшимчани кўрсатиб, «Мана шу дорини роса мақтаяпти, фойдалана бошласам бўладими, сотиб олдим» деб сўрайди. Уларга фойдаланмасликларини ва албатта, бошқаларга ҳам тавсия қилмасликларини тушунтираман», — деди Ҳикматулло Содиқов.
Унинг қўшимча қилишича, шифокорлар томонидан биоқўшимчаларни мақтаб, беморларга тавсия қилишларига маошларнинг камлиги сабаб бўлмоқда.
«Ҳаммаси иқтисоддан келиб чиқади. Буни таг-томири билан йўқотиш учун шифокорларни ойлигини кўтариш керак. Ҳозир арзимаган ойлик билан яшаб бўлмайди. Масалан, баъзи докторлар тўртта бир хил дори бўлса, келишилган фирманинг дорисини ёзиб бериши мумкин. Бундан чўнтагига 4-5 сўм пул қолади. Бу хатó иш, лекин у бу нарсани зарурат деб ҳисоблайди. Иккинчидан, бундай ҳолатлар кўп эмас», — деди Ҳикматулло Содиқов.
Изоҳ (0)