Қирғизистон Тожикистон чегарачиларининг 19 октябрь кунги баёнотини «ҳақиқатдан йироқ» деб атади. Бу ҳақда Asia Plus хабар бермоқда.
19 октябрь куни Тожикистон Чегара бошқармаси Қирғизистонни икки мамлакат ўртасидаги чегарада вазиятни беқарорлаштиришда ва провокацияларда айблади. Тожикистон чегарачилари бир нечта фотосуратлар илова қилиб, «Қирғизистон томони эришилган келишувларга қарамасдан, чегара чизиғига оғир қурол-яроғларни тортиб келаётгани»ни маълум қилди.
19 октябрь куни кечқурун қирғиз чегарачилари, ўз навбатида, тожик ҳарбийларини «иғвогарлик»да айблади. Фотосуратлар эса сентябрда, Қирғизистон ўз қўшинларини чегарадан олиб кетаётганида олинганини маълум қилди.
Тожикистон ҳам, Қирғизистон ҳам бир-бирини окоплар қазишда ва чегарада янги низога тайёргарлик кўришда айблади, бунга далил сифатида суратлар илова қилди.
Тожикистон Миллий хавфсизлик давлат қўмитаси маълумотларига кўра, 26 сентябрдан 15 октябргача бўлган даврда Қирғизистон учувчисиз учар қурилмалари 13 марта Тожикистон ҳаво ҳудудига бузиб кирган.
Худди шундай баёнот билан қирғиз томони ҳам чиқиш қилди, 25 сентябрдан кейин Тожикистон қўшинларининг Қирғизистон ҳудудига бостириб кириши билан боғлиқ 10 та ҳолат қайд этилганини маълум қилди.
Бундан ташқари, қирғиз чегарачилари тожик томонини «ёлланма жангчиларни тайёрлашда ҳамда қурол ва ўқ-дорилар сақлашда масжидлардан фойдаланиш»да айблади.
Садир Жапаров Путиндан ёрдам сўради
Аввалроқ Қирғизистон президенти Садир Жапаров Россия раҳбари Владимир Путиндан Тожикистон билан чегарани делимитация қилиш масаласини ҳал этишда ёрдам сўрагани маълум қилинганди. Россия президенти бу ҳақда ўйлаб кўришга, ҳужжатларни кўтаришга, томонларнинг вариантларини кўриб чиқиб, уларни баҳолашга ваъда берган.Қирғизистон президенти Садир Жапаров, Россия президенти Владимир Путин ва Қожикистон раҳбари Эмомали Раҳмоннинг учрашуви ўтган ҳафта Остонада бўлиб ўтди. Улар қирғиз-тожик давлат чегарасини делимитация қилиш масаласини муҳокама этди.
Чегарага КХШТ қўшинларини жойлаштириш таклиф қилинди
Қирғизистон Тожикистон билан чегарада вазиятни юмшатиш учун унинг яқинда низо юзага келган қисмига Коллектив хавфсизлик шартномаси ташкилоти (КХШТ) ҳарбий контингентини жойлаштиришни мақсадга мувофиқ деб ҳисоблаши ҳақида 19 октябрь куни Бишкекда бўлиб ўтган матбуот анжуманида Қирғизистон мудофаа вазири Бактибек Бекболотов маълум қилди.«Қирғизлар ва тожиклар ўртасига ҳакамлик судьяси кирмагунича, Тожикистон билан чегарада тинчлик ва хотиржамлик бўлмайди. Баҳсли ҳудудларга КХШТнинг кичик контингентини жойлаштириш мумкинки, улар техниканинг чегара яқинидан олиб кетилишини ва ўт очишни тўхтатиш режимини назорат қилсин», — деди у.
Чегарадаги зиддият
Тожикистон ва Қирғизистон чегарасидаги катта кўламли жанговар тўқнашувлар 14—17 сентябрь кунлари содир бўлди. Томонлар ҳалигача бир-бирини отишмаларда айбламоқда.Қирғизистон тўқнашувлар натижасида 62 нафар фуқароси ҳалок бўлиб, 198 нафари жабрланганини маълум қилди. Тожикистон эса расман 41 нафар қурбон ва 30 нафар ярадор ҳақида баёнот берди.
25 сентябрь куни икки мамлакат вакиллари вазиятни тартибга солиш ҳақида баённома имзолаб, чегарадаги низони тўхтатишга ҳамда уни делимитация ва демаркация қилиш жараёнини тезлаштиришга келишиб олди.
Изоҳ (0)