Италия янги ҳукумат даврида Ғарбнинг заиф бўғини бўлмайди, аксинча Европа қадриятлари ва НАТО тамойилларига содиқ қолади. Бу ҳақда ултраўнгчи «Италия Биродарлари» партияси етакчиси Жорж Мелони маълум қилди, деб ёзади Financial Times унинг баёнотига таяниб.
«Италия бошини баланд кўтарган ҳолда ва тўлақонли Европа ва НАТОнинг бир қисми. Бунга қўшилмаган одам ҳукуматнинг бир бўлаги бўла олмайди — ҳатто бу ҳукумат тузишдан бош тортишни англаца ҳам», — деди сиёсатчи. У Италия янги ҳукумат билан Ғарб иттифоқининг «заиф бўғини» бўлмаслигига ишонтирди.
Мелонининг баёноти мамлакат собиқ бош вазири, «Олға Италия» партияси етакчиси Силвио Берлускони Россия президенти Владимир Путин билан алоқаларни тиклаганини айтганидан кейин янгради. Берлусконининг айтишича, у Путинни «тинчликпарвар ва мулоҳазакор инсон» сифатида билади.
«Путин туғилган куним учун менга 20 шиша ароқ ва жуда таъсирли хат юборди. Мен унга ‘Ламбрускў шишалари ва худди шундай таъсирли хат билан жавоб бердим», — деган сиёсатчи.
Шундан сўнг, мухолифатдаги Демократик партия етакчиси Энрико Летта Берлусконининг сўзлари бўлажак ҳукуматга ишончни сусайтиришин айтди. «Бугун Европада туғилган ҳар қандай ҳукумат ё Путин тарафда ёки Украина ва Европа Иттифоқи тарафда бўлишни танлаши керак», деди у.
«5 юлдуз ҳаракати» етакчиси, собиқ бош вазир Жузеппе Контенинг фикрича, Берлусконининг сўзлари мамлакат обрўсига путур етказган.
Италияда сентябрь охирида бўлиб ўтган парламент сайловларида Мелони партияси етакчилигидаги коалиция ғалаба қозонган эди. Жоржиа Мелони Италия бош вазири бўлиши кутилмоқда. У Италия Вазирлар кенгашини бошқарадиган биринчи аёл бўлади.
Изоҳ (0)