Зираворларсиз таом тайёрлашни тасаввур қилиш қийин. Албатта, савол туғилиши табиий, зираворлар қандай қилиб зарарли бўлиши мумкин? «Lisa.ru» нашри тўғри овқатланиш бўйича мутахассис, пластик жарроҳ Лия Гавашели билан биргаликда саломатлик учун хавф туғдириши мумкин бўлган зираворлар рўйхатини тақдим этди.
Лавр япроғи
Шўрва ёки бошқа суюқ таомлар янада мазали бўлиши учун лавр япроғи қўшилади. Мазкур зиравор таомга ўзига хос лаззат бериши билан бирга, антисептик ва яллиғланишга қарши хусусиятларга эга, иштаҳани ҳам очади. Аммо гастрит, ошқозон яраси, панкреатит, холетцистит ва ошқозон-ичак трактининг бошқа касалликлари билан оғриган одамлар учун тавсия этилмайди. Шунингдек, лавр япроғи юрак патологиялари ва буйрак касалликларидан азият чекадиганлар учун ҳам мумкин эмас.
Долчин
Долчинни машҳур зираворлар қаторига қўшиш мумкин, ҳатто у ичимликлардан чой ҳамда қаҳвага ҳам қўшилади. Қолаверса, барча таомларга долчин қўшиб истеъмол қиладиган одамлар ҳам бор. Долчин иммунитетни оширади, стрессдан халос бўлишга ёрдам беради. Шу билан бирга, долчинни ортиқча истеъмол қилиш қонда шакарни камайтириши, қон босими даражасини ошириши ва аллергик реакцияларни келтириб чиқариши мумкин. Ҳомиладор аёллар ва 4 ёшгача бўлган болалар учун долчин тавсия этилмайди.
Зира
Зира жуда фойдали хусусиятларга эга бўлиб, нафақат витамин, балки танин, эфир мойлари, клетчатка, ҳатто спиртни ҳам ўз ичига олган энг машҳур шарқона зираворлардан бири. Зира спазм, стрессни бартараф этишга, мия фаолиятини яхшилашга ёрдам бериши маълум. Шунинг учун уни Альцгеймер касаллигининг олдини олиш учун ишлатиш тавсия этилади. Ҳаддан ташқари кўп миқдорда зира истеъмол қилиш аллергия, кўнгил айниши, қайт қилиш, гастрит ёки ошқозон ярасининг кучайишига олиб келиши мумкин.
Қалампир мунчоқ
Ушбу зираворнинг бир қисми сифатида B гуруҳи витаминлари, бета-каротин, клетчатка, эфир мойлари, C витамини, магний, фосфор ва калийни топиш мумкин. Қалампир мунчоқ яллиғланишга қарши ва антисептик хусусиятларга эга. Қадим замонларда у вирус ва замбуруғга қарши восита сифатида ишлатилган. У спазмларни енгиллаштиради, иммунитетни оширади ва ошқозон-ичак трактига фойдали таъсир кўрсатади. Аммо бу зираворнинг барча фойдали хусусиятларига қарамай, уни ошқозон-ичак касалликларининг кучайиши, аллергияда қўллаш мумкин эмас, чунки уни кучайтириши мумкин, айниқса, юқори қон босими ва ҳомиладорликда.
Ваниль
Ванильнинг таъми кўпчиликка болаликдан таниш, чунки у барчанинг севимли творогли ширинлигига қўшилади. Ваниль ширин, ёқимли таъм ва хушбўйлик бериш учун уй бекалари томонидан ширинликлар тайёрлашда тез-тез ишлатилади. Ваниль қўшилган пишириқларни татиб кўрган ҳар бир киши овқатдан кейин энергия ва кайфиятнинг яхшиланганини ҳис қилиши мумкин.
Ваниль ҳақиқатан ҳам бахт гормонини ишлаб чиқаришга ҳисса қўшади. Бу нафақат ҳиссий ҳолатни, балки асаб тизимининг умумий фаолиятини ҳам яхшилайди, тинчлантирувчи таъсирга эга. Ваниль юрак-қон томир тизими, бўғимлар, оғиз бўшлиғи, шунингдек, тирноқ, соч ва терининг ҳолатига фойдали таъсир кўрсатади. Аммо бош оғриганда, ванилдан фойдаланмаслик лозим, чунки у мигренга олиб келиши мумкин. Қолаверса, аллергия, қон касалликлари ва лактация даврида уни истеъмол қилиш тавсия этилмайди.
Изоҳ (0)