20 октябрь — Бутунжаҳон статистика куни. Шу кун муносабати билан Давлат статистика қўмитаси Ўзбекистоннинг соҳадаги фаолиятига оид рақамлар билан бўлишди.
Қайд этилишича, Open dаtа Inception ташкилотининг маълумотига кўра, жаҳон мамлакатлари орасида Ўзбекистон 124 та очиқ маълумотлар манбалари билан очиқ маълумотлар манбалари сони бўйича жаҳонда 4-ўринни эгаллади.
Бирлашган Миллатлар Ташкилотининг «Электрон ҳукумат кузатуви 2022»да «Очиқ давлат маълумотлари индекси» бўйича Ўзбекистон энг юқори (Very High ОGDI) кўрсаткичига эга бўлган мамлакатлар орасидан жой олган. Жами ушбу индексда 193 та мамлакат баҳоланган.
Мамлакатларнинг миллий статистика тизимини ривожланганлик даражасини баҳолаб борадиган Жаҳон банкининг «Статистика салоҳияти индекси»да Ўзбекистон 67,8 балл билан 154 та давлат орасидан 61-ўринни эгаллаган.
Халқаро валюта жамғармасининг кенгайтирилган Маълумотларни тарқатишнинг умумий тизимида 24 та йўналиш бўйича 422 турдаги Ўзбекистон Республикасининг макроиқтисодий, молиявий ва ижтимоий статистик кўрсаткичлар тўпламларини эълон қилиб борилиши йўлга қўйилди.
Давлат статистика қўмитаси томонидан БМТнинг Тараққиёт дастури билан ҳамкорликда Миллий Барқарор Ривожланиш мақсадларига эришишни мониторинг қилиш бўйича веб-сайт (nsdg.stat.uz) ишлаб чиқилиб, ўзбек, рус ва инглиз тилларида ишга туширилган.
Ҳозирги кунда Ўзбекистон Республикасининг янгиланган ва такомиллаштирилган Очиқ маълумотлар порталида жами 4,5 мингдан ортиқ маълумотлар тўпламлари 3 тилда (ўзбек, рус ва инглиз тилларида) жойлаштирилган.
Очиқ маълумотлар рейтингида (Open Dаtа Inventoрй — ОDIN) Ўзбекистон Республикаси 63 баллни тўплаб, рейтингда 125 та позицияга кўтарилиб, дунёда 44-ўринни, Марказий Осиёда эса 1-ўринни эгаллади.
Изоҳ (0)