Арал Dream ҳамда Ўзбекистон Республикаси Туризм ва маданий мерос вазирлиги томонидан яратилган Орол денгизи муаммосига бағишланган «Шўрхок» янги қисқа метражли бадиий фильми намойиш этилди.
18 дақиқалик фильм Орол денгизининг ажойиб табиатини акс эттиради. Унинг ёрдами билан сиз минтақа аҳолисининг маданияти ва ҳаёти билан яқиндан танишишингиз, шунингдек, денгиз атрофида яшовчилар учун қандай аҳамиятга эга эканлигини ҳис қилишингиз мумкин.
Мазкур фильмни «Иссиқ нон», «Абдулла Қодирий» каби фильмлар орқали мухлисларга яхши таниш бўлган режиссёр Умид Ҳамдамов суратга олган. Бастакор — Адҳам Абдураимов.
Фильмнинг визуал поэтикасини таниқли оператор Жаҳонгир Иброҳимов («Илҳақ», «Ўзбекистонлик») яратган, продюсерлар Мухлиса Азизова, Ойбек Абдушукуров ва Никита Макаренко. Фильм ғояси бош вазир ўринбосари, туризм ва маданий мерос вазири Азиз Абдуҳакимовга тегишли.
«Шўрхок» фильмида актёр Эркин Бозоров, шунингдек, қорақалпоқ рассомлари Арзихан Науризова ва Алишер Акимов рол ўйнаган.
«Шўрхок» фильмининг вазифаси жаҳон ҳамжамияти эътиборини Оролбўйи муаммоларига қаратишдан иборат. Инглиз ва рус тилларидаги субтитрлар билан намойиш этилган фильм халқаро фестивалларнинг танлов дастурида иштирок этади. Унинг хорижий телеканаллардаги намойишлари муҳокама қилинмоқда. Фильмнинг премьераси 1 октябрь куни Берлинда «Ўзбекистонлик» халқаро форумида бўлиб ўтганди. Энди уни YouTube’да ҳам томоша қилиш мумкин.
«Шўрхок» фильми Туризм ва маданий мерос вазирлиги ҳамда Атроф-муҳитни муҳофаза қилиш ва экология давлат қўмитаси кўмагида ташкил этилган Арал Dream халқаро платформасининг биринчи лойиҳаларидан биридир.
«araldream.com» веб-сайтида тест режимида мавжуд онлайн платформа Оролбўйи ва Қорақалпоғистонни ривожлантиришга қаратилган ижодий лойиҳаларни бирлаштирувчи хабга айланиши керак. Платформа ёрдамида сайёрамизнинг ҳар қандай фуқароси ўзи ёқтирган лойиҳани молиявий қўллаб-қувватлаши мумкин бўлади.
Изоҳ (0)