«Ўзбекка ниҳоятда ачиняпман» — Ўзбекистон халқ шоири Усмон Азим жамиятда саводсизлик авж олгани ҳақида

Ўзбекистонда китоб сотиб олиш ва ўқиш нималигини унутган инсон жуда кўп. Бу ҳақда Ўзбекистон халқ шоири Усмон Азим «Фаcтор боокс» нашриёти чоп этган китоблар тақдимотида айтиб ўтди, дея хабар бермоқда «Дарё» мухбири.

Усмон Азимнинг айтишича, жамиятда китобхонлик йўқолиб бормоқда.

Китоб сотиб олиш ва ўқиш нималигини унутган оилалар жуда кўп. Мана бу китобни олиб, боламга элтиб берай, дейдиган одамлар камайиб кетди. Тирик истеъмол жамиятига айланиб бўлибсиз. Бугун фалон кийимни кияди, фалон нарсани ейди, эртага бошқасини кияди ва ейди. Китобдан ташқари ҳамма нарсани сотиб олишади. Қорин тўйса, тўй қилса бўлди. Бошпанани ҳам, албатта, ўйлашса керак. Ўзбекка ниҳоятда ачиняпман. Битта нарсани англадим. Камбағалларга, уларга, буларга қаранглар деган вазифалар бўлади. Менимча, оилаларга қаранглар, уларда китоби борми, деб сўрашни вазифа қилиб қўйиш керак. Уйингда китоб борми, деб сўрасанг, ишонасизми, йўқ, деб жавоб беришади.

Бизнинг ёшлик давримизда китобга муносабат зўр эди. Авваллари китоблар миллионлаб нусхаларда нашр этилар ва ўқиларди. Ҳозир одамларга каллани ишлатадиган нарса керак бўлмай қолди. Мен яқинда бир нарсадан жуда хафа бўлдим. Яъни институтга ўқишга кирмоқчи бўлган ёшлардан имтиҳон олдим. Менга юзма-юз келган абитуриентларнинг битта ҳам китоб ўқимаганлари бор эди. Энг ёмони, бундайларини ниҳоятда кўп учратдим.

Китоб одамни ниҳоятда ўстиради, кўнглини тоза қилади. Илм, дид, руҳ ва кўнгил китобларда мужассам.  Одамларни бой ёки камбағал деб ажратишади. Мен учун эса алоҳида қизиқ бўлган инсонлар, бу китобхонлардир.

Усмон Азим, Ўзбекистон халқ шоири. 

«Бир синфда 30 нафар ўқувчи бўлса, шундан 4-5 нафари аълочи, 4-5 нафари ҳеч нарсани тушунмайдиган билимсиз бўлиши мумкин. Лекин ҳозиргидек ёппасига саводсиз болаларни биринчи кўришим. Мен бу гапларни катта умидсизлик билан гапиряпман. Улар қанақасига мактабни битирган, билмайман. Бундай билимсиз болалар билан эртага ўзбекнинг келажаги нима бўлади?», – деди шоир.