Андижон вилояти соғлиқни сақлаш бошқармасига тадбиркор-фармацевт Журъатбек Қувватов раҳбар этиб тайинланди. Бу ҳақда 18 октябрь куни бошқармада ўтказилган йиғилишда вилоят ҳокими ўринбосари Насибилло Мўминов маълум қилди, дея хабар берди «Дарё» мухбири.
Журъатбек Қуватов 1986 йил Андижон шаҳрида туғилган бўлиб, 2008 йилда Тошкент фармацевтика институтини тамомлаган. Иш фаолиятини «Замин барака имкони» масъулияти чекланган жамияти дорихона мудирлигидан бошлаган. Турли йилларда дори воситалари экспертизаси ва стандартизацияси давлат маркази Андижон вилояти бўлими сертификатлаштириш бўйича эксперти, Андижон дори воситалари тиббий буюмлар ва тиббий техника экспертизаси ва стандартлаштириб шўъба корхонаси директори вазифаларида фаолият олиб борган. 2018 йилдан буён «Андижонфарм эркин иқтисодий зонаси» дирекцияси раҳбари лавозимида ишлаб келаётган эди.
У вилоятдаги йирик фармацевт тадбиркорлардан бири бўлиб, айни пайтда «Маkro farm academy» нодавлат таълим муассасаси, «Маkro farm al-sansar» қўшма корхонаси, мевали дарахтлар, буталар ва ёнғоқларнинг бошқа турларини етиштиришга ихтисослаштирилган «Макро техноагро бизнес» фермер хўжалиги, тиббий ва стоматология асбоблари ва жиҳозлари ишлаб чиқарувчи «Макро Фарм Андижан» МЧЖ таъсисчиси ҳисобланади. Бундан ташқари 2020 йилдан буён «Андижон» футбол клубига ҳам эгалик қилиб келмоқда.
2020 йилнинг декабрь ойидан буён вилоят Соғлиқни сақлаш бошқармасига раҳбарлик қилиб келаётган Салоҳиддин Юсупов саломатлиги туфайли ўз хоҳишига кўра лавозимидан озод этилгани, унинг ўрнига бошқарма бошлиғи вазифасини вақтинча бажариш аввал шу лавозимда ишлаган Қудрат Ярқулов тайинлангани ҳақида хабар берилганди.
Изоҳ (0)