Монополияга қарши курашиш қўмитаси раиси ўринбосари Бекзод Умматов Асака тумани ҳокими этиб тайинланди. Бу ҳақда Халқ депутатлари Асака туман Кенгашининг навбатдан ташқари сессиясида маълум қилинди, деб хабар бермоқда «Дарё» мухбири.
Бекзод Умматов 1982 йилда Тошкент шаҳрида туғилган бўлиб, 2003 йилда Тошкент Молия институтини, 2016 йилда Банк-молия академиясини тамомлаган.
Туманнинг янги ҳокими меҳнат фаолияти давомида давлат бошқарув тизимида бир қатор вазифаларда ишлаган. Жумладан, 2004—2010 йилларда банк соҳасида ишлаган, 2011 йилдан Рақобатни ривожлантириш Давлат қўмитаси тизимида турли лавозимларда фаолият олиб борган. 2017—2019 йиллар давомида Вазирлар Маҳкамасида ишлаган.
Умматов 2019 йилнинг февраль ойидан буён Монополияга қарши курашиш қўмитаси раисининг ўринбосари сифатида ишлаб келаётганди. Туманнинг собиқ ҳокими Мансур Алихонов 2020 йилнинг сентябрь ойида Асака тумани ҳокими лавозимига тайинланганди. У мазкур тайинловга қадар Жалақудуқ тумани ИИБ бошлиғи лавозимида фаолият юритган.
Изоҳ (0)