АҚШда сентябрь ойида истеъмол нархлари (CPI индекси) ўтган йилнинг шу ойига нисбатан 8,2 фоизга ўсди. Бу ҳақда мамлакат Меҳнат вазирлиги маълумотларига таяниб, Bloomberg хабар бермоқда.
Шундай қилиб, инфляция август ойида 8,3 фоиздан секинлашди, лекин Bloomberg ва Trading Economics томонидан сўралган таҳлилчилар томонидан кутилган 8,1 фоиздан юқори бўлди.
Энергия нархининг ўсиши августда 23,8 фоизга ошганидан кейин ўтган ойда 19,8 фоизгача секинлашди. Жумладан, бензин 18,2 фоизга, электр энергияси 15,5 фоизга, табиий газ 33,1 фоизга қимматлашди.
Шу билан бирга, озиқ-овқат нархлари бир ой олдинги 11,4 фоиздан кейин 11,2 фоизга ўсди. Шунингдек, сентябр ойида CPI индекси августга нисбатан 0,4 фоизга ошди.
Озиқ-овқат ва энергия харажатларини ҳисобга олмаганда истеъмол нархлари (асосий CPI индекси) сентябр ойида йиллик кўрсаткичда 6,6 фоизга ва ойлик кўрсаткичда 0,6 фоизга ўсди.
Бу 1982 йил августидан бери 40 йиллик максимал даражадир. Август ойида ўсиш йил давомида 6,3 фоиз ва ой учун 0,6 фоизни ташкил этганди.
АҚШ Федерал захира тизими (Fed) пул-кредит сиёсати бўйича қарорлар қабул қилишда муҳим омиллардан бири бўлган истеъмол нархларининг ўсиш суръатлари ҳақидаги маълумотларни диққат билан кузатиб боради. Fed учун инфляция мақсади 2 фоизга тенгдир.
Изоҳ (0)