Доллар 2000 йилдан бери энг юқори кўрсаткичга етди ва йил бошидан буён иенага нисбатан 22 фоизга, еврога нисбатан 13 фоизга ва ривожланаётган бозор валюталарига нисбатан 6 фоизга ошди. Бу ҳақда «РБК» маълумот бермоқда.
Бу деярли барча мамлакатлар учун муҳим макроиқтисодий таъсирга эга, чунки доллар халқаро савдода энг кўп қўлланиладиган валютадир, — деди Халқаро валюта фонди.
ХВФ маълумотларига кўра, 2000 йилдан бери АҚШнинг жаҳон товар экспортидаги улуши 12 фоиздан 8 фоизга тушган бўлса, долларнинг жаҳон экспортидаги улуши қарийб 40 фоизни ташкил этади. Кўпгина мамлакатлар учун бу ўсиб бораётган инфляцияга қарши курашни қийинлаштирди.
Баъзи ҳукуматлар валюта инъекцияларидан фойдаланмоқда — йилнинг биринчи етти ойида ривожланаётган бозор мамлакатларнинг умумий валюта захиралари 6 фоиздан кўпроққа камайди. Бироқ бу чора фақат бир муддатгина ёрдам беради.
Доллар курсининг кучайиши Россиядан бир қатор товарлар импортига қарши санкциялар фонида юзага келган энергетика инқирози билан боғлиқ.
JPMorgan раҳбари Жейми Димон АҚШда ва бутун дунёда рецессия олти ойдан тўққиз ойгача бошланиши мумкинлигидан огоҳлантирди. Унинг фикрича, Европа иқтисодиёти аллақачон рецессияда.
Жаҳон банки президенти Дэвид Мелпасс ва ХВФ бошқарувчи директори Кристалина Георгиева ҳам глобал рецессия хавфи ҳақида гапириб, инфляция доимий муаммо бўлиб қолишини таъкидлади.
Сентябр ойида Fitch халқаро рейтинг агентлиги 2022 йилда глобал ялпи ички маҳсулот ўсиши прогнозини июнь ойида кутилган 2,9 фоиздан 2,4 фоизгача пасайтирди.
Fitch прогнозига кўра, жорий йил охирига келиб Европа ва Буюк Британия таназзулга юз тутади, 2023 йилнинг ўрталарида эса АҚШда мўътадил иқтисодий таназзул бошланади. Йиллик ҳисобда Европа ва АҚШда ЯИМ ўсиши 2023 йилда 0 фоизга яқин бўлади.
Изоҳ (0)