Адлия вазирлигида 14 октябрь куни «Аёлларга ҳуқуқий мадад» амалий қўлланмасининг тақдимоти бўлиб ўтди. Тадбирда Оила ва хотин-қизлар давлат қўмитаси, Аёлларни реабилитация қилиш ва мослаштириш республика маркази, аёллар соҳасида фаолият юритувчи нодавлат-нотижорат ташкилотлари ва ОАВ вакиллари иштирок этди.
Қўлланма Конрад Аденауэр фондининг Ўзбекистондаги ваколатхонаси кўмагида Адлия вазирлиги қошидаги «Адолат» миллий ҳуқуқий-ахборот маркази» томонидан нашр этилди. Қўлланма муаллифлари Адлия вазирлиги мутахассислари Шаҳноза Соатова ва Ф.Тожиев ҳисобланади. Унда никоҳ ва оила, фуқаролик масалалари, таълим, меҳнат, соғлиқни сақлаш, ижтимоий ҳимоя каби соҳалардаги асосий ҳуқуқий ҳужжатлар ҳақида маълумотлар берилган.
Жумладан, қўлланмада келтирилган ҳужжатлар хотин-қизларнинг кундалик ҳаётидаги долзарб масалаларга тааллуқлидир. Қўлланмани ўқиб, хотин-қизларнинг шахсий, сиёсий, иқтисодий ва ижтимоий ҳуқуқларига оид саволларига жавоб олиш мумкин.
Ундаги ҳуқуқий ҳужжатларни электрон форматда Ўзбекистон қонунчилик маълумотлари миллий базаси – Lex.uz сайтида топиш мумкин. Бироқ яқинда эълон қилинган ЙUNICEFнинг ҳисоботига кўра, Ўзбекистонда интернетдан ҳеч қачон фойдаланмаган 14–30 ёшли қизларнинг улуши 68 фоизни ташкил этади. Шуни инобатга олган ҳолда қўлланманинг нашр этилиши китобхонлар доирасини сезиларли даражада кенгайтиради, чунки уни «Аёллар дафтари» ва «Ёшлар дафтари»га киритилган хотин-қизларга бепул тарқатиш режалаштирилган.
Юқоридаги қўлланманинг нашр этилиши 2022—2026 йилларга мўлжалланган Ўзбекистоннинг тараққиёт стратегиясида (69-мақсад: Хотин-қизларни қўллаб-қувватлаш ва уларнинг жамиятдаги фаоллигини янада ошириш) белгиланган вазифаларни амалга оширишга хизмат қилади.
Изоҳ (0)